Central sawrkar school zawng zawngah Class 6 aṭanga Class 10 inkarte zir turin Yoga Education telh a ni dawn tih Education Minister Smriti Irani chuan nimin khan a sawi a, hetihlai hian sawrkarin School-a Yoga zir ngei ngei tur (Compulsory) a ti anga media-ten headline-a an tarlan chungchangah Irani chuan “Headline diklo a ni” tiin Twitter-ah a chhânglet a ni.
Sawrkar chuan zirlaite chu physical education course hrang hrang zingah an duha an thlan theih turin dah a ni dawn tih a sawi a ni.
Yoga Teachers’ Conference-a zirlaite tana Yoga Syllabus thar leh course material a tlangzarhnaah Irani chuan State te chu he course an zir duh leh duh loh chungchangah zalen taka duh an thlan theihna pek an ni a ti a, zirtirtute training programme-ah pawh Yoga telh a nih tur thu a sawi a, a ministry chuan Delhi-a national-level yoga competition buatsaih turin ruahmanna a siam tih sawiin, heta a tiṭha ber chu pawisafai cheng nuai 5 pek a nih tur thu pawh a sawi bawk.