SERCHHIP: June ni 11, 2015 (Ningani) a “Green Mizoram day 2015” Serchhip District-a hman dan tur ngaihtuahin nimin chhun khan Serchhip DC Conference Hall-ah District-Level Committee on Green Mizoram chu an Chairman Pi Juhi Mukherjee, IAS hovin an ṭhukhawm.
Nimina District-Level Committee on Green Mizoram ṭhukhawm hian kum kalta lama hmalak dan te thlirlet pahin kumin Green Mizoram Day hlawhtling taka hman a nih theih dan tur an ngaihtuah a, Serchhip khawpui bakah, Serchhip leh East Lungdar RD Block Development Officer te chu an bial chhunga thing phun tur pek an ni ang a, North Vanlaiphai SDO(C) leh North Vanlaiphai DFO ten an ṭhuthmunah he ni hman dan tur lo ruahman tur a tih an ni a, Thenzawl SDO(C) pawh hetiang bawk hian mawhphurhna pek a ni.
Kumin Green Mizoram Day thupui atan hian “I Dam Khawchhuah Nan Thing Phun Rawh” (Plant Trees for your survival) tih hman a ni a; Serchhip khawpui huamchhungah chuan Sawrkar Department hrang hrang leh Zirna In te, Tlawmngai Pawl leh NGO hrang hrang ten thing an phun dawn a, a bikin Eklavya School, Kawlritlangah leh Dawngzawl panna kawngpui sirah te beihpui thlak a ni ang. Hetih rual hian thing phun nun tawh sa pawh uluk taka chei ṭhat leh tur a ni a, thing ṭiak leh a hungna tur hmanrua te chu thing phunna tur hmunah Forest Department-in an dah vek ang a, School hrang hrang anmahni compound a phun tute chuan bialtu Range Officer hnen aṭanga ngaihven tur a ni. Kohhran leh Tlawmngai Pawl anmahnia a hrana phun duh te pawhin DFO, Thenzawl hnenah an mamawh zât an thlen ang a, an phunna tur hmun endik a nih hnuah pek an ni ang. SAGY hnuaia MP Model Village pahnih Khawlailung leh Chhiahtlang-a phun tur thing ṭiak 2000 ve ve pek an ni bawk ang.
Green Mizoram Day pual hian Photo Exhibition changtlung tak neih tum a ni a, Serchhip Photographers’ Association te nen ṭangrualin hma lak tur a ni a, School naupang ten khawlaiah poster an tar bawk ang.
Green Mizoram Day pual inkhawm hi Serchhip DC Conference Hall-ah June ni 11, 2015 zing dar 8:30 ah neih a ni bawk ang.