## Mizoram pumah thing ṭiak nuai 36 chuang phun a ni tawh a, Serchhip District-ah thing ṭiak nuai 2 chuang phun a ni tawh bawk
## Kuminah thing ṭiak 525 phun a ni
SERCHHIP: District Level Committee on Green Mizoram, Serchhip hmalaknain nimin zing dar 8:30 khan Serchhip DC Conference Hall-ah Green Mizoram Day 2015 pual a inkhawm buatsaih a ni a, Hrangturzo bialtu MLA Pi Vanlalawmpuii Chawngthu chuan khuallian niin he hun hi a hmanpui.
Green Mizoram Day 2015 puala inkhawma thusawitu khuallian Pi Vanlalawmpuii Chawngthu chuan thingphun satliah mai bakah a enkawl puitlin lamah pawh ṭan kan lak a ngai nasa hle a ni a ti a, Green Mizoram day chu mipuite hnena ramngaw ṭha neih a pawimawh zia hrilh hriat ṭhat lehna ni a nih ang ngeiin kum tin thu ngai reng sawi a ni ṭhin a, mipuite pawhin kan hre-chiang thawkhat tawhin a rinawm a, hei vang hian kan zawm ngei a ṭul a ni a ti a, thing phun ve theilo leh peihlo kan awm a nih pawhin mi phun sa tal hi chu i humhalh pui ṭhin ang u a ti bawk. Pi Awmpuii chuan NLUP kaltlangin ram-ngaw chereu tur tam tak hum-him a ni tawh a ni tiin ramngaw humhalh leh ramkâng ven ṭhat kawnga ṭhahnem-ngai taka mipuite zirtirna pe ṭhintu print media leh visual media te chung-ah lawmthu a sawi bawk a ni.
He inkhawm hi Pu VL Remliana, Addl. DC, Serchhip-in a kaihruai a, Pu Lallianzuala, DFO, Thenzawlin report pe-in, YMA Sub-Hqrs President Pu RL Chhuanawma’n thu tawi sawina hun a hmang a, he inkhawmah hian PCR High School zirlaite leh zirtirtute bakah tlawmngai pawl hrang hrang te, sawrkar hnathawk te an tel ṭha hle a ni.
Report-a a landanin, Serchhip District-ah hian kum 1999 aṭang khan Green Mizoram Day hi hman ṭan a ni a, Mizoram pumah thing ṭiak 36,06,302 phun ni tawhin, Serchhip District bikah chuan thing ṭiak 2,05,847 phun a ni tawh a ni.
Nimin inkhawmah hian kangmei ven leh ramngaw humhalh lam hawi zawng intihsiakna buatsaiha lawmman latute hnenah Khuallianin lawmman a sem nghal a ni.
Green Mizoram Day pual inkhawm neih zawh a nih hnu hian Serchhip Zawlpui phai panna kawngah leh Kawlri tlanga Eklavya School compound-ah Khuallian Pi Vanlalawmpuii Chawngthu hovin Sawrkar Department hrang hrang a thawk te, Sub-Headquarters YMA Serchhip leh Serchhip District MJA member- ten ten thingphun hnatlang hi an nei a, kumin Green Mizoram Day puala thingphun hnatlang neiahah hian thing ṭiak 525 phun a ni.
Nimin vek khan Serchhip District chhunga North Vanlaiphai Sub-Division, Thenzawl Sub-Division leh East Lungdar RD Block ah te Green Mizoram Day hi urhsun taka hman a ni bawk.