European Space Agency (Esa) chuan Simeikhu-a ṭum tura an tirh chhuah, boruak lawng chu hlawhtling takin simeikhu-ah a ṭum a, a khâwl pawh tinungin, lei lamah thu thawn pawh a nei tawh tih an sawi.
He boruak lawng, simeikhu-a ṭum hi ‘Philae’ tiin a hming an vuah a, boruak lawng tirhchhuah zinga simeikhu-a ṭum hmasa ber a ni a, nikum November thla khan amah kengtu, boruak lawng lian zawk, Rosetta aṭanga chhuakin simeikhu (Comet 67P)-ah hian a ṭum a, Philae hi Washing Machine tiat vel chauh a ni a, Rosetta hian he simeikhu thleng tur hian kum 10 chhung zet a zin kawng a zawh a, Philae hi simeikhu-a vûr leh lung awmdan zir chiang tura duan a ni.
