State 4-in Maggi khap leh ta

Delhi-in an khap hnu-ah State 4 – Gujarat, Tamil Nadu, Jammu and Kashmir leh Uttarakhand te pawhin an State chhunga Maggi zawrh chu an khap ve leh ta.
Nestle noodles siam, Maggi chu Laboratory-a an test aṭanga Monosodium Glutamate (MSG) a tel tih leh dân phal chin aia tam lead (suan) a awm tih hmuhchhuah a nih avang hian Tamil Nadu leh Uttarakhand sawrkar chuan an State chhunga Maggi zawrh hi thla 3 chhung atan an khap a, Gujarat pawhin thla khat chhung an khap a, Jammu & Kashmir pawhin mihring ei atan a ṭha tawk tih report a awm lo chuan thla khat chhung an khap bawk a, heng state te hian an state chhunga Maggi stock awm te pawh la lêt turin Nestle hi an hriattir tawh bawk a ni.

Nestle hian Maggi chungchanga Complaint awm hi an tuar hle a, Maggi hi an thil siam chhuah zinga sum an lakluh tamna ber pawl a ni a, Complaint a awm hnu hian Nestle share hi za-a 15 laiin a tlahniam tawh a ni.

Food Security Standards Authority of India (FSSAI) chuan nimin khan N.Delhi ah meeting neiin, Maggi chungchang an sawiho a,  State hrang hrang te’n a sample an lakkhawm chu FSSAI hian a endik dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram