Thing tiak phun hnatlang nei

Lok Sabha MP Pu CL Ruala’n SAGY Programme hnuaia Model Village a siam tur atana a thlan Khawlailung khua chuan an khua model village a nih theihna tur atana hmalakna pakhat atan nimin nileng khan an khaw ramri chin kawngpui sirah thing ṭiak phun hnatlang an nei.
Thing ṭiak phun tura an kal chhuah hma hian Khawlailung kawnah vantlang inkhawm buatsaih a ni a, he hun hi Pi Teresy Vanlalhruaii, MCS, Charge Officer, Khawlailung Model Village chuan kaih-ruaiin, thingphun tura khaw-tual mipuite thawhchhuahna ah lawm thu a sawi a, Sawrkarin thing hi a phun sak lova, anmahni ngeiin an khawtlang leh an tu leh fate lo awm zel tur tan thing an phun a ni tih hria a, enkawl uluk turin a chah a, Model Village siamna rahbi hmasa atan anmahni thlangtu Lok Sabha MP in cheng nuai 15 a sanctioned tawh thu leh hemi sum hian Khawlailung kawnah Bazar Building tha tak 50 ft x 12 ft a zau, chhawng hnih a sang sak a nih dawn thu a sawi bawk a ni.

Thusawitu dang Pu Andrew H.Lalremruata, MIS, DIPRO pawhin Khawlailung mipui te chu tunah hian khaw entawntlak (Model) an la ni rih lova, entawntlak a siam tum mek an ni tih inhria se a duh thu sawi-in, an hmalak dan leh hmasawn dan zawng zawng te, Village Deve-lopment Plan an bawhzui dan te a bul aṭang uluk takin record a nih dawn thu leh documentary film pawh siam a nih dawn thu sawiin midangte hnena chhuang taka in khaw chan-chin kan thehdarh theih nan ṭan la ang che u tiin a fuih a ni.

SAGY kaihhruainain a duhthusam ang takin nimin thingphun hnatlang hi NREGS (DRDA), Environment & Forest, I&PR Department leh NRLM, East Lungdar RD Block ten convergence a an huaihawt a ni a, Khawlailung ram chin Tuichang Lui kai aṭanga Chekawn ramri thleng kawngpui dung tluanah thing hi phun tura ruahman niin vawiinah pawh thing ṭiak phun hna hi chhunzawm leh a ni ang.

Nimina thingphun hnatlang-a tel tur hian mi 500 chuang an thawkchhuak a, National Rural Livelihood Mission hnuaia Khawlailunga Self-Help Group 33 member ten khawchhung cheimawi hna an thawk bawk a, Pu J. Lalsawta, Range Officer, North Vanlaiphai hnen aṭangin thing ṭiak phun dan dik inzirtirna hun hman a ni bawk a, tun tumah hian thing ṭiak 2000 phun tum a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram