Digital India Week hawng

Prime Minister Narendra Modi-a’n nimin khan New Delhi ah Digital India Week a hawng a, hei hi ram chhung mipui ten tunlai thiamna thar ber ber hmanga hriatna zau an neih theihna tur leh Information technology chungchang mipuite hrilhhriat nana tih a ni.
Digital India project hnuaiah hian broadband internet hmangin Gram Panchayat zawng zawng thlunzawm an ni ang.

Prime Minister hian Digital India programme hnuai-ah digital locker, e-education leh e- health te telin sawrkar scheme hrang hrang a hawng bawk.

Hetihlai hian, ram chhunga state 29 leh UT 7 a district 600-ah digital India platform hnuaia hetiang programme hi hawn a ni bawk.

Mizorama Information Communication and Technology Secretary Pu Lalhmachhuana’n a sawi danin, Digital India hnuaiah hian Broadband Highway siam te, Khaw tina Phone hmanga inbiak pawhna ṭha neih te, Khaw tina Internet ṭha pek te, Sawrkar thil leh lehkha pawimawh E-Governance hmanga kalpui leh pekchhuah te bakah thil chi hrang hrang hemi kaihhnawih hmalak mek a nih thu a sawi a.

Vawiinah he hapta hman tur hi Chief Minister Pu Lal Thanhawla chuan Mizoram tan a tlangzarh ve tur thu a sawi a, hemi hnu hian he hapta pual hian kartluana ruahmanna siam a nih thu leh heng zingah hian Journalist tana Digital India chungchang ni khat awh workshop siam te, TV a zirtirna pek te, ni 4 a Marathon huaihawt te leh ICT lama Hackathon leh Senhri Competition siam te a tel tih an sawi a, a kharna ni 5 ah lawmman
semin, ICT Minister Pu Lal Thanzara chuan he hapta hi khar tura ruahman anih thu a sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram