Political Party lian pathumten Remna Ni hmang

MNF ten zahawmna neia an lo haw theihna turin lal ṭhuthleng ken an ni:Hawla
Nimin, June ni 30, MNF leh sawrkar laipui inremna ni champha, Remna ni kha sawrkar ang chuan hun hman a ni lova, sawrkar chawlh puan a nih angin Office leh zirna in te khar vek a ni a, he ni pual hian Mizorama Political Party lian pathum – MPCC, MNF leh ZNP te chuan a hran ṭheuhin hun an hmang.
Congress party chuan remna ni hi Aizawla Vanapa hall ah hmangin, hetah hian Chief Minister leh party President Pu Lal Thanhawla chuan thu a sawi a, remna ni chu mitin tan thil lawmawm a nih thu sawiin, buai hun nang pha tan phei chuan a hreawmzia hre vek an nih thu leh a hre pha lo tan pawh remna leh muana chu thil hlu a nih thu a sawi a, he ni hi mitin thawh rah a nih thu leh mimal ṭhenkhat hmalakna bil anga sawi chi a ni lova, sawrkar, kohhran leh NGO te leh mitin thawhrah a ni tih sawiin, tu emaw hamṭhatna duha lo sawi danglam an awm a nih pawhin en liam mai thiam a tul tih a sawi a. Remna ni thlen theihna tura kum 1984 a an party thlang tlingtu la dam leh thi tawh zawng zawng chungah lawmthu a sawi tih a sawi bawk. Pu Lal Thanhawla chuan remna kawng chu a thui takzet a ni tih sawiin, lalthuthleng ken an inpeih thu a an sawi chu central-a hotuten an hrethiamlo hle tih sawiin, heti chung hian Mizoramin remna a neih theih na tur leh, a lo haw tur MNF ten zahawmna neia an lo haw theihna turin lal ṭhuthleng chu an kian tih a sawi a ni.

Remna hi Kohhran leh mipui ngenna vang a ni:Dr.Thangtea
MNF chuan Aizawla an party Office Hnam runah Remna ni hi an hmang thung a, hetah hian an Vice President Dr R.Lalthangliana chuan thusawiin, Hnam pa Pu Laldenga chu Mizo Nationalism bul ṭantu a nih angin remna ni-ah hriatreng a ni a ti a, Remna ni thlen theihna chhan chu kohhran hruaitu, khawtlang leh mipui te ngenna avang a nih thu a sawi a, ram leh hnam tana rammu zawng zawng te an zah thu leh an chawimawi thu a sawi bawk.

Dr Thangtea chuan Mizoram chu India rama rinluh luih leh awpbeh a ni tih sawiin hemi hnu hian Self declaration a zalenna puan a nih hnuah nun-na leh pawngsual leh hreawm tinreng tawrh zui a ni tih a sawi a, hemi hnu hian remna leh muanna thlakhleh vanga kohhran leh mipui ngenna avanga hmuh a nih hnuah ram leh hnam hmangaihna rilru hi ṭhangthar leh zirlai te rilruah harh thar zel se a duh thu a sawi.

‘Barhluih Remna’ a nawra nawr chhuah a ni:Lalduhoma
ZNP chuan an Party Office Aizawl-ah he ni pual hun hi hmangin, an President Pu Lalduhoma chuan Remna leh Muanna Mizoramin a neih hi ‘Barhluih Remna’ a nawra nawr chhuah a ni” a ti a, rampumin haw hawin remna chu an nawr a. Zirlai pawl (SJAC) huaihawt-in, Secretariat kawt-ah, kum 1986 June ni 23 aṭangin chhun zan zawmin mipui tam tak leh zirlaiten chaw an nghei a. Mi tam tak man an ni a. Ni 4 leh zan 4 chaw an nghei hnuah Minister Bangla zawng zawng chu hual tum a ni ta a. Minister tumah office kal emaw, pawn chhuak ngam emaw an awm tawh lo a. Remna chu an siam loh chuan sawrkar chu nam thluk a ni tho tho dawn tih a chiang a, chuvang chuan loh theih lohvin June ni 30, kum 1986-ah chuan remna siam ni ta a ni a ti.

Dinhmun ken leh ken loh chungchangah ZNP President chuan, UT aṭanga State-a luh dawn chuan UT sawrkar chu ṭhiatin MLA te term chu a tawp nghal ṭhin a. Thla 6 hnuah State sawrkar thar a ding ṭhin a. UT aṭanga State-a hlankai engemaw-zat an awm tawh a, ‘State nih theih nan dinhmun an kian’ an ti ve ngai reng reng lo a. MNF-te khan Interim sawrkar siam kha ngen lo pawh ni se, State nih dawn chuan UT MLA term chu a tawp a ngai hrim hrim a. District Council aṭanga UT a Mizoram hlankai a nih dawn pawhin MDC te term chu tihtawp a ni a, “UT nih theih dinhmun an kian” tiin an sawi ve hauh lo a ti.

Remna neih hnuah Interim sawrkar chu siam a ni ta a. MNF duh ang chu a ni ta hauh lo a. Interim sawrkarah chuan MNF chu 4 lek an tel ve a, Congress erawhchu 7 lai an tel ta si a ni a ti a. UT sawrkar ṭhiah a nih tak avanga MLA term tawp ta te chu dinhmun kiantuah sawi tel an ni ve lo tih sawiin, engvang-a opposition MLA 10 te kha dinhmun kiantuah sawi tel an nih ve loh a ti a, hei vang hian ‘Dinhmun ken’ tih hi Party pakhat “Dawi bur” mai a ni, a ti.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram