Serchhip Supply Godown-a Weight Bridge a diklo

SERCHHIP: Serchhip Supply Godown-a Weight Bridge chu a hman tlak loh tih Legal Metrology chuan Inrinni khan an hmuchhuak.
Inrinni khan Legal Metrology Deptt. chuan Serchhip Supply Godown-a buhfai bukna, Weightbridge chu buhfai phurtuten a dik lo nia an hriat avangin an endik a, Legal Metrology te hian Weightbridge hi a dik lo ngei a ni tih an hmuchhuak a, Weightbridge hi buk a san poh leh a dik lo nasa tih an hmuchhuak a, Hei vang hian Serchhip Godown-a buhfai dah turte chu bûkna khai chia buk rih mai turin an hriattir nghal a ni.

Serchhip Godown-a Weightbridge te hi K Rochhuma, Dy. Controller hovin Lalsangzuala, Inspector Serchhip District leh Chalneihkima, Inspector Aizawl West ten an endik a, Weightbridge hi Weightex Company siam niin Ton 30 buk thei nia hriat a nih laiin khawl chuan Ton 50 thleng a buk theih thu a tarlan thu an sawi bawk, Legal Metrology ten Weightbridge an endik hi Serchhip District Consumer Union ten an tawiawm a, Weightbridge that loh thu hmuhchhuah a ni chu lawmawm an tih thu an sawi rual-in siam tha thuai tura chak taka hmalak a tul thu an sawi a, Buhfai bukna pui ber a that loh chuan kuta buk a ngaih dawn thu sawiin kuta buk a nih dawn avangin buhfai thleng te chak taka dah luh theih a nih dawn loh avangin siam that thuai a tul thu an sawi.

Serchhip Supply Godown a thawktute sawi danin, Weightbridge hmang hian ni khatah buhfai trip 4 aṭanga trip 5 thlenga godown-ah buhfai dahluh hman a nih laiin, bukna khai chi hmanga buk a nih chuan ni khatah buhfai trip 2 bak dahluh hman a ni lo a, hei vang hian buhfai dahluh leh lakchhuah hna a khaihlak nasa hle dawn tih an sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram