Serlui B Hydel Project aṭangin Cheng vbc. 46 man hu power siam chhuah a ni tawh

Serlui ‘B’ hydel project chu vawiin thlengin mumal taka hawn la nilo mah se he hydel project aṭang hian cheng vaibelchhe 46 man hu power siamchhuah tawh tawh a ni. Hetihlai hian Serlui Tuikhuah atangin Sanghah quintals 300 vel thar a ni tawh bawk.
Serlui B Tuikhuah hi kum 2010 July thla atang khan power siamchhuahna atan hman tan a ni a, Serlui B Power Project Division Bilkhawthlir hotute sawi danin, he Tui-khuah hian vawiin thlengin Power Megawatt Unit 130 a pe chhuak tawh a, hei hi cheng vaibelchhe 46 man hu a tling a ni.

Serlui B Tuikhuah hi Carbine 3 hmanga Megawatt 12 pe chhuak tura duan ni mah se, hman tan a nih atanga khawl pakhat fello vangin vawiin thlengin power a pek chhuah tur zat ala pe chhuak theilo a, nikum kum 2014 kumtawp lam atangin khawl dang pakhat ah harsatna a awm leh bawk avangin tun dinhmun ah khawl pakhat chauh hman a ni a, khawl pakhat hmang hian power megawatt 4 pek chhuah thin a ni. Serlui ‘B’ Hydel Project-a power siam chhuah hi Bawk-tlangah Power Substation ah pek chhoh a ni a, heta tang hian mizoram hmun hrang hrangah a tul dan anga sem darh thin a ni.

Hetihlai hian Serlui B Hydel Project tuikhuaha Fisheries deptt-in cage culture hmanga sangha an khawi chu hralh chhuah mek zel a ni a, tun thleng hian quintals 300 vel tharchhuah tawh a ni.

Fisheries deptt. hotute sawi danin, Serlui-B tuikhuah chhunga sanga bawma sangha khawite chu phuhlip nei lo chi, Pangasious Suechie a ni a, tunlai hian New Secretariat kawtah an hralh chhuak thin a ni. Kg khat Rs 100-in an hralh a, mahse an beisei ang a la nih chiah loh avangin sangha chi dang, Common Carp khawi turin hma an la mek bawk.

Serlui-B tuikhuahah hian North Chawnpui leh Bilkhawthlira sangha khawitu chhungkaw 48-te enkawl turin cage culture siam a ni a, September 27, 2013-ah hawn a ni. Mi 48-te chuan sanghate chu chaw pein an enkawl a, an hralha a hlawkna chu mi 48-te leh Fisheries deptt-in zat leh zata an insem tura tih a ni. Cage pakhatah sangha 4,000 zel khawi a ni a, cage 48 a awm.

Serlui-B tuikhuahah hian Fisheries deptt. chuan kum tin sangha chi chhuahin, sanghate chu tender chhuahin an mahal tir thin a, sangha mahal atangin Fisheries chuan kum 2012-13 khan cheng nuai 6 a la lut a, kum 2013-14 ah nuai 7.1 lalut lehin, 2014-2015 khan cheng nuai 8 vel a lalut leh bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram