USA-in Final an lut

FIFA Women’s World Cup khelh mekah nimin zing khan USA hmeichhia te chuan Montreal-a Olympic Stadium-ah vawi 2 champion tawh Germany hmeichhia te hnehin final an lut a, hei hi USA-in final ṭum 4 an khelhna tur a ni dawn a ni.
Mi 50,000 chuang zetin a hmuna an en, Semi-Final inkhel hmasa zawkah hian Germany Striker, Celia Sasic chuan minute 58-naah Penalty a pet goal lova, hei hi Germany vanduaina inṭanna niin a lang a, minute 10 hnu-ah USA-in Penalty an hmu ve leh a, USA tan hian an Captain Carli Lloyd chuan a pet goal ta thung a, hun tawp dawn minute 6 la awmah USA chakna tichiang turin Kelley O’Hara chuan goal a thun leh a, hun a tawp a, USA chu 2-0-in an chak ta a ni.

USA hian tukina inkhel tur England leh Japan inkhela a chak zawk zawk hi Thawhṭanni khian Final-ah an hmachhawn dawn a ni.

Olympic Champion USA hi defence line-ah an che ṭha hle a, tun tournament-a an match hmasa bera Australia laka goal 1 an chhuah tih loh chu goal an la chhuah miah lova, Sweden nen 0-0-a an in-draw bak chu hnehna an la chang vek bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram