Wimbledon title Djokovic-a’n a humhim; Martina Hingis a che ropui

Novak Djokovic chuan kumin Wimbledon final-ah Roger Federer hnehin a title kawllai a humhim.
Djokovic hian a khingpui, Grand Slam Nomawi chawi hnem ber ni mek, Federer hi 7-6, 6-7, 6-4, 6-3-in a hneh a, hei hi Djokovic-a’n Grand slam title 9 a lakna a nih bakah Wimbledon title ṭum 3 a lakna niin, Federer, Connors, Agassi, Lendl, Emerson leh Sampras te hnung zuiin Grand Slam-a vawi 200 chak thei zingah a tel ve ta bawk.

Kum 33 mi ni tawh mahse Federer hi la ṭha hle a, mahse a vanglai hmang chho mek Djokovic chu a ngam ta lo deuh niin a lang a, Federer hi chak chiah se chuan Wimbledon-a vawi 8 champion thei hmasa ber a ni thei dawn a, a hun ṭha a hmang ṭangkai thei ta lo a ni.

Federer chuan, “Set hmasa berah khan hun ṭha ka nei a, set hnihna ka la ta hram a. Set thumnaah pawh hun ṭha chu ka nei tho. Mahse Novak kha a ṭha zawk a, ka khel chhe em em chu a ni hran lo”, tiin a khingpui a fak tel bawk.

Novak hian kumin Australian open Nomawi chawi a, French Open-ah erawh Final-ah Wawrinka a hneh lovaa, Wimbledon-a rawn la leh a, kuminah vawi 48 zet a chakna niin vawi 3 a tlawm ve tawh bawk.

Hmeichhe lamah World Number one Serena Williams chuan 2015 Wimbledon final-ah 6-4 6-4 a Spanish Garbine Muguruza hnehin Wimbledon title 6-na a la ta a, 2003 hnuah Serena Slam kan hmu leh ta a, major title 4-te chu a kawl kim leh ta a ni.

US Open chu thlaleh hian a khel leh dawn a, heta a champion leh a nih ngat phei chuan a career-a a vawi khat nan kum khat chhungin Grand Slam title 4 a la thei dawn a ni.

Doubles-ah hrang hlui Martina Hingis a rawn che ṭha hle a, Women’s Doubles-ah Sania Mirza nen ṭangdunin an champion a, hei hi kum 17 hnu-a Grand Slam-a a champion lehna hmasa ber a ni a, hei bakah hian Mixed Doubles-ah Indian tennis star Leander Paes nen an champion bawk a ni.

Women’s Doubles-ah hian Mirza nen hian Ekaterina Makarova leh Elena Vesnina te ṭangdun chu 5-7, 7-6 (7-4), 7-5-in an hneh a, Mixed Doubles final-ah hian Paes nen hian Alexander Peya leh Timea Babos te ṭangdun chu 6-1, 6-1-in an hneh bawk a ni.