Zothlifim Logo
Loading ...

Nimin zing khan School Education Minister Pu H. Rohluna’n North Eastern Council (NEC) Secretary Pu Ram Muivah, IAS chu Aijal Club-ah Education Reforms Commission (ERC) tihhlawh-tlinna tur a sawipui.
Pu H.Rohluna chuan NEC Secretary hi titipuiin Education Reform Commission rawtna tih-hlawhtlinna atana sum mamawh dan a sawipui a. NCERT Director pawh lo ni tawh zirna lama mithiam Prof AKSharma hova Education Reform Commission din a nih dan te, report an theh-luh hnuah Group of expert ten an report chu an zirchian leh thu te a hrilh a. Commission rawtna engemawzat chu tihhlawhtlin anih tawh thu leh tuna hmabak la awm infrastructure tihhlawh-tlinna atan sawrkarin sum a mamawh dan te a hrilh a, infrastructure lamah hian mamawh hmasa chu school building lam ai mahin zirtirtute quarters anih thu a sawi bawk.

Parliamentary Secretary Pu Joseph Lalhimpuia pawhin Tata Trust nen ṭangkawpa School Edu-cation Dept. in Science, Maths leh English zirna (CLIx) kalpui ṭan a nih thu te, NEIDA nen thawk-hovin Football Academy pawh tan thuai tur anih dan te sawiin NEC chu a theih ang anga puibawm turin a ngen bawk a ni.

Pu Ram Muivah, IAS chuan charge a lak ve chauh thu leh ERC rawtna tihhlawhtlinna tur chu priority list-ah rawn tarlan leh ni se a ti a, a ṭul anga lo bawh-zui a tum thu a sawi bawk. Planning Secretary Dr C.Vanlalram-sanga pawhin ERC chu NEC planetary session-ah pawh sawilan anih tawh thu leh state sawrkarin a ngaih pawimawh thu a sawi a, a thawh khatna chu release phawt tur leh a bak chu thensawma a tahtawla kalpui tur anih dan a sawi bawk.