Haryana-a Jat-ten an hnam tana sawrkar hna hauhsak ngiata nawrh an huaihawt ni 8-na nimina hmun hrang hranga buaina chhuakah mi 6 an thi leh a, hengte nen hian nawrh kaihhnawihah mi 10 thi tawhin midang 150 velin hliam an tuar bawk a ni.
Curfew puan ni mahse nimin khan Delhi bul Gurgaon-a rel station ticket counter hal a ni a, Bhiwani-ah ATM hal a ni bawk. Rohtak khawpui atanga intan, nawrhna hian state chhung hmun dang a kang kai chho zel a, Delhi leh Haryana, Punjab, Himachal Pradesh leh Jammu & Kashmir inkalpawhna National Highway No.1 chu Inrinni atang khan dan pin a ni a, Shimla panna kawngpui pawh Panchkula bulah dan chah a ni.
Nawrh huaihawt chhung hian rel station 7 hal a ni tawh a, hei vang hian rel 700 vel din tir a ni. Rel leh motor kawng dan chah anih avang hian thlawhna chuan man, nasa takin a san chhoh phah a, Chandigarh leh Delhi inkar thlawh man, cheng sang 3 atanga sang 4 vel ni thin chu Rs.16,000 aṭanga Rs.27,000 inkar velin a sang chhova, Jaipur leh Delhi inkar thlawhna chuan man pawh a sang chho a ni.
Haryana atanga Delhi tui supply hna pawh tih tawp a nih avangin Delhi khawpuiin tuiah harsatna namenlo a tawk mek a, he harsatna avang hian Delhi sorkar chuan naktuk hi sorkar sikul leh college-te tan chawlh a puang a ni.
Hetih lai hian Haryana sawrkar chuan state Assembly session neih tura Jat hnam tana hna hauhsakna tur Bill put luh a ni ang tih a sawi.