Mizoram Ṭhalai Kristian Pawl (MṬKP) Inkhawmpui, Lawngtlai CYLA Playground-a neih chu nizan khan a ṭiak a ni.
Zirtawpni khan rorel inkhawm neiin, chuta an thurel te chu – MṬKP-in rampum huap-in a ruala chawnghei ṭawngṭai neih te, Christian Hospital, Serkawn puala Unit tin feh chhuah te, Human Trafficking chungchang inzirtir te, ruihhlo ṭhat lohzia inzirtirna neih te, MṬKP Inneih lawmpuina Certificate-ah Baptist Church of Mizoram tih ziak tel te a ni a. Kum 2016-2017 MṬKP Budget atan Rs.9,50,000/- pawm a ni bawk. Kum 2017 MṬKP Rorel chu Zotlang North Biak Inah nghah a ni dawn a, 2019 MṬKP Inkhawmpui chu Tlabung Pastor Bial-in an thleng ang.
MṬKP Organiser report-in a tarlan danin – Pastor Bial 80-ah Unit 402 awmin member – Hmeichhia 15474 leh Mipa 26147, Member zawng zawng hi 41621 an ni.
Bazar Bial-ah member tam berin 1800 an awm a, Parva Bial-ah member tlem berin an vaiin member 89, an awm thung. Kumin (2015-2016) chhungin an member 102 (mipa 92 leh hmei-chhia 10) an thi a, nupui/pasal nei tuak 590 awmin chung zinga tuak 319 (54.06 %)chu Dan pui-tlinga innei an ni a, tuak 271 (45.93 %)chu Dan tê-a innei an ni thung. Bial 80 zingah bial 77 (96.25 %) in Missionary an (châwm) support a. Unit 402 aṭangin unit 231 (57.46 %) in Missionary support an nei bawk.
MTKP Inkhawmpui hi nizan khan a ṭiak a, mikhual inziaklut 7025 an awm a ni.