Lunglei Sub-Hqrs. YMA-in an ngenna pawisa lo mi tam tak awmin YMA rilru a tina takzet tih an sawi

Lunglei Sub.HqrsYMA hruaitute chuan nimin khan Lunglei-a YMA Office-ah thuthar lakhawmtu te kawmin Lungleia hnamdang hming hawha sumdawntirtu Mizo te an hming hawhtir titawp tura an ngenna chungchang sawiin YMA ngenna pawisalo mi ṭhahnem tak an awm chuan YMA rilru a tina takzet an ti.
An pawl president Pu R.Lalnunthara chuan Hnamdang sumdawng te hnena Mizo hming hawh tir hi nakin hun lokal zel atan a Mizo te tan a pawi tur a nih avangin kum 2016-a YMA Gen. Conference leh kum 2011 Gen Conference-a thu lo pass tawh bawhzuina zel a ni tih sawiin kum 2011 khan Sub.Hqrs YMA pawhin hma an la tawh tih a sawi a, khami ṭum khan Mizo hming hawh a sumdawng 39 leh hnamdang phalna nei lova sumdawng dawr 72 hmuhchhuah a ni a, YMA chuan heng hi titawp turin hming hawh tirtu te bakah DC leh SP Lungleiah te ngenna an lo thehluh tawh thu a sawi a, mahse an beisei angin hmalakna a awm lo a ni a ti. Kum 2015 Sub-Hqrs YMA Conference-ah pawh he hmalakna hi chhunzawm zel tur a tih a niin Survey neih nawn leh a ni a, hetah hian Mizo hming hawha hnamdang sumdawng dawr 46 hmuhchhuah leh a ni a.YMA chuan lehkha ziakin hming hawhtirtu te hi titawp turin a ngen leh a, November ni 17 2015 khan heng dawr te hi tlawhkualin December 2015 ral hmaa anmahni hminga neitu nihna an siam theilo a nih chuan an sumdawnna titawp tur a ngen leh an ni. Kumin January thlaah khan an ngenna ngaih pawimawh a nih leh nih loh enkual leh a ni a, YMA ngenna ngai pawimawh mi ṭhenkhat an awm a, a tam zawk erawhin an ngai pawimawh lo tih an sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram