Medical College dinna atana hmalakna kal mek sawiho

Nimin khan Chief Minister’s Conference Hall-ah Health Minister Pu Lal Thanzara hovin Health Department senior officer-ten Medical College neih thuai a nih theihna tura hmalakna kal mek an sawiho a, hetah hian Health Minister chuan Aizawl Civil Hospital chu District Hospital a puan a nih tak vanga tih têt (downgrade) tum ni awma thuthang awm mek chu a diklo tih sawiin Health Minister chuan tihtêt tum a hnekin tih-changtlun zelna turin nasa taka hma lak a nih zawk thu a sawi
Meeting kaihruaitu Health Minister chuan State Referral Hospital, Medical College nei thei tur hian hospital-ah khum 250 tal a awm tur a ni a, chawh-rualin damlo 400 talin Out Patient Department (OPD) nitin an pan ngei tur a ni, tih a nih avangin thawktu doctor leh staff dah belh zel an ni a, damlo pantu pawh an pung chak hle, Pu Lal Thanzara chuan a ti.

Aizawl Civil Hospital tih-changtlun hna thawh kal mek zingah Dental Unit-a Operation Table 1 leh khum 6 awmna ward, Cardiology Department ah khum 10 awmna ward leh State Medical Library te chu hawn mai hmabak a nih thu a sawi a. Tar chaklo te awmna tur khum 10 awmna Geriatric Ward leh room 14 awmna tur Semi Cabin sak mek te, ICU (5 beds) leh khum 10 awmna tur Trauma Centre sak hmabak te, Haemodialysis Unit tan khawl thar 2 lei belh te, Sick Newborn Care Unit (SNCU) ah khum 2 dah belh leh nausen upna 5 dah belh te, Laboratory tihchang-tlunna tur Auto Analyzer PPP mode a bun tur te leh Central Sterile Supply Department (CSSD) ah khawl thar bun a ni te hian Aizawl Civil Hospital tihchangtlun zel zawk a nih zia a ti lang a ni, a ti. Pu Lal Than-zara chuan Aizawl Civil Hospital chu Nurses Training Centre atan te, kum 2013 a bul ṭan tawh Doctor te tan DNB (Post Gra-duate Course) leh MBBS internship tih nan hman chhun-zawm zel a nih tur thu leh Aizawl Civil Hospital chu District Hospital ni chunga Super Speciality Hospital a nih chhun-zawm zel tur thu a sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram