Mizoram hi ruihhlo hmanga rûnin a awm mek:Lalsawta

SERCHHIP: Finance Minister Pu Lalsawta chuan thu sawiin, “Mizoram chu khawvela inrûnna hlauhawm ber, ruihhlo hmanga rûnin a awm mek a ni,” a ti.
He thu hi Inrinni zingkara Central YMA Office tuala ruihhlo chi hrang hrang Supply Reduction Service (SRS)-te man, Rs.27,66,800/- hû chu a halralnaah a sawi a, Pu Lalsawta chuan Mizoram ramri hmun thum a ṭhena hmun hnih vel lai chu international border a nih bakah, awlsam taka kalpawh theih, khawmual vek a nih miau avangin sawrkar tan pawha luhaithlak khawpin ruihhlo tawlhrûk a hluar tih a sawi a, ruihlo do tur chuan sawrkar leh tlawmngaipawlte leh mipuite kan ṭanrual a ngai a ni, a ti bawk. Minister chuan ruihhlo do kawnga mipuite pawimawhna sawiin, Mizo hnam hi pawn lam mite thil tih engemaw vang mai main a ral dawn lova, Mizorama cheng, Mizote thiltih avang erawh chuan a ral thei a ni tih hre thar leh turin mipuite a chah bawk. Ruihhlo dona kawnga YMA hmalakna fakin Minister chuan, “Mite huat hlawh khawp a YMA-ten an man khawm, ruihhlo kan halral tur hi a bul ṭanna chauh a ni a, sawrkar pawhin theihtawpin hma a la dawn a ni,” a ti a, Mizo mipuite leh sawrkarin ruihhlo a duhloh zia leh theihtawpin a do zel dawn tih entirnan meichher dep kaiin ruihhlo te hi a hal ral.

Inkhawm hi CYMA Vice President Pu Vanlalruata’n a kaihruai a. CYMA General Secretary Pu Lalhmachhuana chuan ruihlo do kawnga CYMA hmalakna leh an harsatna tawhte a tarlangin, “Dan hnuaiah chuan kan thuneihna piahlam a ni tih hre mahila, dan hnuaia thawktute tichak tura ruihhlo kan do hian, ram leh hnam humhalh tura ke pen chhuak YMA-te hi kan tihloh tur ti-ah kan in ngai lo a ni,” a ti a. Ruihlo leh a kaihhnawiha mante hian an phu tawk hremna an hmu thinlo chu pawi a tih thu sawiin, “Kan man ngaite hi kan man nawn fo a ni,” a ti. Mizoram sawrkar chu Drugs policy leh Drugs control-na turd an mumal tak siam thuai tura an duh thu leh Magistrate-te pawhin tuna dan awmsa hnuaiah pawh sawrkar leh tlawmngaipawlte hi ruihlo do kawngah ṭhahnem ngaihpui deuh se a duh thu a sawi bawk.

SRS Secretary Pu R.L. Zomawia chuan April ni 11, 2015 atanga tun hun thlenga SRS hmalakna leh ruihhlo man tawh zat report a pe a, Report-a a landan chuan April ni 11, 2015 aṭanga February ni 19, 2016 chhung khan CYMA hnuaia SRS-te chuan ruihhlo Rs.9,00,50,600/- man hu an man tawh a. Ruihhlo man zingah hian metamphetamine (Meth) tam berin mum 2,52,800 (Rs.7,58,40,000/- man hu) lai an man hman a. Heroin-in dawtin Rs.1,39,23,000/- man hu an man bawk. Heng bakah hian Alpra-zolam (AP) Rs.2,69,100/- man leh Ganja (Marijuana) Rs.18,500/- man hu an man tel bawk. Ruih-hlo kaihhnawihah hian mihring 1007 an man tawh a. Chung zinga mi 825 chu Councelling pek an ni a, mi 39 Home leh Centre hrang hranga an dah bakah mi 78 chu excise leh police hnenah an hlan bawk.

Ruihhlo halral tak te hi No 4 hawng 28 leh can 448, Alprazolam strip 274 leh Ganja Kg. 1 a ni a. Aizawla an hralhna rate-a chhutin nimin zinga ruihhlo halral zawng zawng hlutzawng hi Rs.27,66,800/- a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram