NEC Secretary-in Governor leh Chief Secretary te a kâwm

North Eastern Council, Secretary Ram Muivah chuan ni 2 châmin Aizawl a rawn tlawh a, niminpiah tlai khan Governor Lt. Gen. Nirbhay Sharma nen Raj Bhavan-ah an inkawm a, nimin zing khan Chief Secretary Pu Lalmalsawma nen an inkawm leh nghal a ni.
Pu Muivah chuan theih-tawp an chhuah chung pawhin an chhût lawk ang leh beisei aia tlem zawk sum an hmuh avanga hmalakna tam tak tihpuitlin theih a ni lo tih Governor chu a hrilh a a. An harsat-na te sutkian a nih theih nan theihtawp lo chhuah sak turin Governor chu a sawm a ni.

Governor chuan Mizoram chhunga Autonomous District 3 te chu District hnufual an nih anga ngaihsak an tul thu NEC Secretary hi a hrilh a. ACT East Policy avangin North East State te chu Asia ram dang te tan sumdawnna kawngpui a ni thuai dawn a. Sumdawnna kal-kawng dunga awm nih a tawk lova sumdawnna hmun nih a ngai tih sawiin, State lian zawk te siam chhuah sa thawn chhuah-na kalkawngpui nih ringawt chu hmarchhak bial mipui ten an hlawkpui dawn lova. International Border pela thawn chhuah tur Mizoramah leh hmar-chhak state ah te siamchhuah mai bakah thalai te International Trade ah sumdawng thiam turin zirtir a ngai a ti bawk.

Nimin khan Chief Secretary Pu Lalmalsawma leh Secretary dang ten nen inkawm lehin NEC Secretary Pu Muivah chuan NEC-in Fund pek chhuah a harsat chhan chu Central aṭanga an sum hmuh tur aia tlem zawk an dawn vang a nih thu a tarlang a. NEC sum kawl leh hmuh theih awm chhun te chu Kawngpui siam nan hman chhunzawm a ni ang a, Medical College, Skill Development leh Hmarchhak bial chhunga School of Architecture pakhat tal din nan hman tum a ni bawk ang a ti. Pu Muivah ho hian Secretariat Conference Hall-ah sawrkar mi pawimawhten NEC kaltlanga Mizorama hnathawh te an thlirho a, Mizoram sawrkara Department hrang hrang 18 te chuan NEC sum hmanga thawh hna kallai 57 an nei a. Heng zingah hian 13 chu thawh zawh thawkhat tawh niin 44 te hi thawh mek an ni. Scheme leh project 57 thawhna tur hian NEC chuan cheng vbc 845 chuang a pawmpui tawh a, NEC leh State in a do letna sum a pekchhuah tawh zat chu cheng vbc 525 vel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram