Nimin tlai khan Raj Bha-van-ah Aizawl leh Tuipang inkar National highway 54 laih zauh leh siamṭhat hna thawktu tur National Highways and Infrastructure Development Corporation(NHIDCL) hotute chuan Governor Lt.Gen(Rtd) Nirbhay Sharma hmu in an hnathawh tum dan an hrilh.
Pu VK Srivastav, General Manager, NHIDCL leh Pu Piyush Singh, Project Manager, NHIDCL, Mizoram te chuan Japan International Cooperation (JICA) sum pukin KM 380 a thui, NH 54, Aizawl leh Tuipang khaw inkar kawngpui chu cheiṭhat a nih tur thu Governor an hrilh a. NH 54 hi 12 metre lai a zauva siam a nih dawn bakah alkatra luan chin pawh 8 Metre a zau a nih tur thu an sawi a. Kumin chhunga land acquisition chinfel hman a nih chuan nakum hnathawh theih hun aṭanga kum 4 ral hma ngei a siam zawh tum a ni an ti.
Governor chuan NH 54 ṭha takin KMMTTP kawngpui chhim lamah a thlun zawm thei chu lawmawm a tih thu sawiin Mizoram tan a hlu hle dawn a ni a ti a. Mimal ram lâk hêk tur chinfel, central sawrkar nen indawrnaa harsatna awm thei leh kawngpui siam tiṭhuanawp thei chinfelpui an ngai a nih phawt chuan a theihna zawnah hma a lo lak tur thu NHIDCL hotute hi a hrilh a. Mizoramin kawngpui ṭha a mamawh em avangin NHIDCL te chu an hnuaia contractor te felfai taka enkawl reng turin a hrilh a ni.