SERCHHIP: Nimin khan Aijal Club-ah Indian Council on Agricultural Reaseach (ICAR)-Indian Institute of Oil Palm Research, Pedavegi, Andhra Pradesh, Department of Agriculture (CH), Government of Mizoram leh Department of Agriculture, Cooperation and Farmers’ Welfare, Government of India, New Delhi te ṭang-kawp buatsaihin hmachhak biala Oil Palm tam zawk thar chhuak tura hmalak dan tur zirhona an nei a, he hun hi Finance Minister Pu Lalsawta’n a hmanpui a ni.
Workshop hmanpuitu, Pu Lalsawta chuan Mizo mipuiten tun aia nasa zawka ram hausak-na an haichhuah thiam theihna tur leh sumdawnna kawnga hma an sawn theih nana ṭanpui-tu tur mithiam tak tak State pawn aṭangin an lo kal ṭhin a, tun ṭuma Oil Palm chin leh hralh chhuah kawnga mithiam lo zin mekte pawh hi Mizo mipuiten a ṭangkai thei ang bera an thiamna chhawr tur leh workshop hlawhtling a nih theihna tura a tel zawng zawngten uluk taka an ngaihtuahna seng turin a chah a. Minister chuan kum zabi 19-na hunlaia mipui leh sawrkar thuneihna inchuhtawn hunlai sawi chhuakin tun din-hmunah erawh ram fing apiang-ah mipui leh sawrkar thawhho-na a ṭha a, an intichaktawn zawk ṭhin, a ti a. Sawrkar ṭha chuan kawng hrang hranga eizawnna dap mek mipuite kawng kawhhmuhin an mamawh hmanrua leh thiamna a pe a, oil palm workshop pawh hi chutianga thawhhona ṭha thlentu hmanraw ṭangkai a nih ngei a beisei thu a sawi a ni.
ICAR-Indian Institute of Oil Palm Research, Director Pu. Dr R.K. Mathur pawhin thu sawiin Mizoram chu India Hmarchhak-ah Oil Palm thar chhuah kawngah hmahruaitu a ni mek tih a sawi a, Agriculture Department hmalakna te leh taimakna chu a ropui a ti a. Oil Palm chingtute chu engtik-lai pawhin an harsatna leh thiam thil lam ‘Technical Know How’ ah puih an inhuam reng thu te a sawi lang bawk a ni.
Inaugural function hi Agriculture Director (Crop Hus-bandary) Dr C. Lalzarlianan a kaihruai a, kalkhawmte lawmna thu sawiin an department hma-lakna hrang hrang a tarlang nghal a. Oil Palm hi Mizoramah 2004 atanga scheme hrang hrang hnuaia chin ṭan niin The Mizoram Oil Palm (Regulation of Production & Processing) Act, 2004 chu December 2, 2004 ah Mizoram Assambly ah pass a nih thu a sawi a. Tunah hian district 7-a khaw 225 ten ram hectare 23,358 a zauvah, Oil Palm hi an ching mek a ni tih leh kuthnathawktu mi 10,800 lai mai chuan hnathawh pui bera an neih mek thu a tarlang bawk a ni.
Regional Workshop hi Technical Session I, II leh III ah then niin scientist leh officer hrang hrangte’n kalkhawm te hi zirtirin power point presentation hmangin an entir a ni. Vawiin hian Oil Palm chinna hmun leh Block Demonstration Plots Khamrang ah field visit an neih leh nghal dawn a ni.