Dân lova Airgun lei leh hralh khuahkhirh turin ngên
Chief Conservator of Forest (Wild Life) Pu Lalrin-mawia chuan tunhnaiah silai hmanga Sava veha ṭum khata tam tak tak suat a ni tih an hriat thu leh hetiang titu te hi man chhuaha hrem tura hmalak a nih thu a sawi.
Niminpiah khan hemi chungchangah hian meeting hmanhmawh koh a ni a, he meeting-ah hian tunlai hian silai, foreign siam, Internet Online Shopping aṭanga chah, entlang ṭha tak tak nei, hla tak tak ami pawh sai thei a awm tak avanga hetianga ni khat thil thua sava 100 dawn te suat an awm nia hriat a nih thu tarlan a ni a, hetiang tih ching hi ṭhahnem tak an awm thu te, hetianga tih hi Wildlife (Protection) Act, 1972 bawtchhiatna a nih thu te leh jail tantir thlenga hremna pek theih a nih thu te tarlan a ni a.
Hetianga tih chingte man chhuaha tihtawp vat a nih loh chuan sava an rêm mai a hlauhawm thu te an sawiho a, Facebook-a group ṭhenkhatah hetiang ti ṭhin nia hriat an awm ni-a a lan thu leh heng mite hi Mizoram Police-a Cyber Crime lam mithiam te kaltlanga man chhuah turin hmalak nise an ti a ni.
Hetihlai hian Association for Environmental Preservation (ASEP) chuan Mizoram sawrkara State Board for Wildlife- ah, licence neiloa zalen taka Sava vehna atana Air Gun hmanna hluar lutuk chu khuahkhirh turin ngenna an thlen a ni.
ASEP President Pu K.Lalmuansanga sawi danin, State Board for Wildlife-ah hian tunhnai khan licence awmlo a Air Gun hmanna hluar lutuk chu khuahkhirh tura ngenna ASEP hmingin thlen a ni a, hemi chungchangah hian ASEP President chuan Air Gun hi a duh tan lei mai tur a tam nia a lan thu leh a leitu tur te pawhin zalen takin an lei mai nia a lan thu te, hei hi Mizorama nungcha, a bikin Sava kah nan nasa taka hman mek a nih vangin licence neiloa Air Gun lei leh hralh khuahkhirh tura ngenna hi State Board for Wildlife ah an thlen ta niin ASEP President chuan a sawi.
ASEP President chuan tunlai in Aizawl hnaivai deuh khaw hrang hrangah Air Gun hmanga Sava veh hi a hluar hle niin a sawi a, hemi chung-changa an hmalakna ah hetianga Sava veh ṭhin te hi a tam zawk chu Aizawl lam mi an nih thu leh Aizawl aṭanga Sava veh te hian Air Gun ṭha tak tak an hman thin thu a sawi. “Tam tak an kap thla a, a sa an ei duh vang pawh a nilo, infiamna ah an ngai niin alang,” tiin, “Heng mite hi an hnawksak hle a, an thil tih ṭha lo tak hi bansan se kan duh takzet a ni,” a ti bawk.
ASEP hi kum 2005 khan din ṭan a ni a, an hmalakna avangin tun thleng hian Silai license nei 1 leh tualchher 7 surrender an awm tawh a, Sairawkherh 2500 chuang leh thang chi hrang hrang 600 chuang surrender tawh an awm bawk.
ASEP hian Mizoram hmun hrang hrang tlawhin awareness campaign an nei thin a, Sapel hratte hnena sim tura ngenna lehkha thawn chhuah te, Camera hmanga sava vehna programme neih te, Social Media facebook kaltlanga inzirtir-na neihte hi ASEP hmalakna langsar deuh dangte an ni.
Mizoramah hian ramngaw sq. km 15940 vel a awm a, chu chu Mizoram zau zawng atangin za ah 90.68 niin, Sava chi hrang hrang 640 vel an awm mek anga ngaih a ni.