Serchhip-a YMA hruaitute tan Kumpuan Seminar-cum-Leadership Training nei

SERCHHIP: Inrinni khan Sub-Hqrs. YMA Serchhip Kum-puan Committee-ten Serchhip Town huam chhunga Branch YMA hrang hrang Office Bearer chin tan Serchhip Hmar Veng YMA Hall-ah ‘Kumpuan Seminar cum Leadership Training’ an buatsaih a, Central YMA lam aṭangin Kumpuan Thupui ‘Ram leh Hnam hum-halh’ tih chu Pu Lalrochuanga, Central YMA Fin. Secratary in thiam takin a sawi a, chawhnu lamah Leadership Training hi Pu Lalrinmawia Sohnel, Central YMA CEC in a neihpui bawk a, Hall a leng lo YMA hruaitu rual an kalkhawm a, kalkhawm ten hlawkthlak an ti hle.
Session khatna hi Sub-Hqrs. YMA Serchhip Asst. Secretary leh Kumpuan Committee Chairman ni bawk Pu H.Lalrinawma’n a kaihruai a, Vice President Pu Kawl-ṭhuama’n hunserh hmangin Pu Kapliana Pachuau, Kumpuan Committee Secretary-in report tlangpui pe-in inhmelhriattirna hun a hmang bawk a, Sub-Hqrs. YMA Serchhip Secretary Pu R.Sanghmingthanga’n inlawmna thu sawi pahin Kumpuan Committee hmalakna tlangpui a tarlang bawk.

Session khatnaah hian Pu Lalrochuanga, Central YMA Fin. Secratary chuan YMA Kumpuan thupui sawiin “Ram leh hnam humhalh tur chuan hnam a kan chian phawt a ngai a ni” a ti. ‘Mizo’ tih hi ‘Lusei’ tihna emaw tia la ngai tlat – ‘Kei chu Mizo ka ni lo, Lai ka ni, Hmar ka ni’ lo la ti tawk kan awm hi a pawi a, Lai ṭawng hi Mizo ṭawng a ni a, chutiang zelin Mizo hnahthlak tawng hrang hrang hi Mizo ṭawng vek a ni. A khaikhawm nan tuna a tam berin Mizo ṭawng kan tih tak hi kan hmang a ni mai tiin Mizo-ah lungawi ila, i in pawm tlang ang u a ti.

Pu Rochuanga chuan “Electoral Roll hmangin kan ram hi kan ven a ngai a ni” a ti a, tun dinhmuna E.Roll a chuang lo tur chuang tam lutuk chu ngaimawhawm a tih thu sawiin YMA hruaitute hi sum hmanga lehkha ziahtir theih kan ni ta em ni? tiin kan ram hian lei mai mai theih loh YMA hruaitu leh man nei lo YMA hruaitu a mamawh a ni a ti a, Roll Revision laiin YMA hruaitu te kan inthlahdah thiang lo a ti bawk.

A sawizelnaah Pu Rochuanga chuan Tuikuk leh Chakma pung chak lutuk chu ngaimawhawm tawp a ni tawh a ni a ti a, dân lova hnamdang sumdawng te dâl tura YMA in theihtawp a chhuah laia khaw-tual mi, Mizo dik tak inti si ten an thlavang hauhva an lo thawh-pui duh zel ṭhin chu huatthla-laawm tak a ni tih sawiin Ram leh Hnam Humhalh tur chuan Intodelh te, Zu leh Ruihhlo laka fihlim te, thinlung taka Pathian rawngbawl te a pawimawh a ni tih uar takin a sawi bawk.

Session hnihna Leadership Training hun hi Kumpuan Committee Vice Chairman Pu Zolianmawia’n kaihruaiin Central YMA CEC Pu Lalrinmawia’n hun a hmang ve thung a, YMA hruaitu rual kalkhawm te chu “YMA chu Politics rawngkai lo, Tlawmngai Pawl a ni” tih hre reng turin a chah.

Pu Rinmawia chuan zawl-dawh chunga vantlang rawng-bawltu ni turin YMA hruaitu kalkhawm te chu a ngen a, YMA thuvawn “YMA chu ṭanpui ngai te ṭanpuitu a ni” tih hi kan chakna, kan zahawmna ber a ni tiin, YMA Branch hrang hrang te hian ṭanpui ngai te ṭanpui turin kan Treasurer kuta sum tam tak a awm kher a ngai lova, midang te tana kan inpek dan a zir te, kan ṭhahnem ngaih-dan a zir te, kan hnathawh dan a zir te-in kan Treasurer kuta sum awm lo chung pawhin cheng nuai tam tak, mi inphal te zarah kan thehchhuak fo thei a ni a ti.

A sawizelnaah Pu Rinmawia chuan hetia changpat cheh chhum ang maia awm lova Section, Branch, Joint, Group, Sub-headquarters leh Central YMA thlenga fel taka kan inthlunzawm hi a la hlu tual tual dawn a, hetia kan insuih-khawm a, kan thawhho dial dial hian kan zahawm a, kan beih tur te tana hlauhawm khawpa chet emaw, hlawk thama hna-thawh nan emaw a ṭul ṭhin a ni a ti bawk.

‘Kumpuan Seminar cum Leadership Training’ hi Central YMA CEC mi 6 laiin an rawn hmanpui bawk a, hun karlakah Sub-Hqrs. YMA Zaipawl te, Lawmi Khiangte leh Lalruatsangi ten kalkhawm te zaiin an awi reng bawk a, a tawpah Sub-Hqrs. YMA President Pu RL Chhuanawma’n kalkhawm te hi lawmthusawiin a tin a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram