Serchhip-ah Road Safety Week hawng

District Road Safety Committee, Serchhip huaihawtin nimin khan Serchhip DC Office tualzawlah kar khat (8th February, 2016 – 15th February, 2016) awh tur ‘27th Road Safety Week, 2016’ hawnna inkhawm buatsaih a ni a, District Bawrhsap, Dr. Lalrozama, IAS chuan khuallian niin he Hapta hi a hawng a ni.
serchhip_road-safety-weekHawnna thusawiin District Bawrhsap chuan motor accident in kawng tam takin kan nunphung min nghawng a, hei vang hian Sawrkar in motor neitu leh enkawltute bakah mipuite hnenah fimkhur a tul zia inhrilh thar pawimawh a ti a; hemi atana hmalakna pawimawh tak Road Safety Week hi kumtin rampum huap a hman ṭhin a ni a ti a, Mizorama Motor accident chungchang zir chiang tura hotuten an ruat avanga amah ngei pawhin theihtawp chhuaha a lo beih ve tawh thu sawiin, motor accident chhan tam ber pakhat chu fimkhur loh vang leh hmangchang hriat loh vang a ni a ti a, Motor neitu/Driver tam tak chuan an motor vawn lai chanchin an hre bel tawk lo ṭhin a, hei hian harsatna tam tak a thlen ṭhin a ni a ti bawk.

27th Road Safety Week, 2016 hi tun thla ni 15 thleng hman tur niin thupui atan ‘Accident laka kan fihlim theih nan a takin hma i la ang u’ tih chu hman a ni a, February ni 11, 2016 hian Serchhip-a Maxicab, Taxi leh Auto-Rickshaw khalh-tute tan training buatsaih a ni ang.

Nimina Road Safety Week hawnna inkhawm hi Pu Sanghnuna Pachuau, DTO, Serchhip-in a kaihruai a, Serchhip khawpui chhunga Sawrkar Department hrang hrang hotute, Zoram Drivers’ Union Sub. Hqrs. Serchhip aiawhte, Passenger phur motor Association hrang hrang hotute bakah Serchhip District MJA member te an tel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram