Naktuk, Thawhlehni, March ni 1 aṭanga Taxi intlanchhawkna tura sawrkarin ruahmanna a siam chu dodalna a awm chungin taxi khalhtu mi 1,550 velin sticker an la chhuak tawh.
Aizawl Traffic Control Room-a duty te sawi danin taxi driver in report hrim hrim hi Aizawl district-a local taxi in ziaklut 6,501 aṭangin 3,500 chuang an ni tawh a, chu’ng zinga 1,540 chuang chuan sticker an la chhuak tawh a. Nimin, Pathianni pawh khan engemaw zatin an la chhuak leh niin Traffic Control Room duty-te chuan an sawi a. Traffic SP Pu C.Lalthan-mawia chuan document felfai neih loh vanga in-report lo an tam a rin thu a sawi a. Taxi tlan ṭhin tak hi chu 3,500 leh 4,000 inkar vel an nih a rin thu a sawi bawk.
Dodalna hrang hrang awm mahse, Co-ordination Committee on Traffic Management-in thutlukna a lo siam tawh angin Thawhlehni aṭanga taxi intlan chhawk tura ruahmanna awm hi sawrkar chuan kaltlangpui a tum a. Traffic SP Pu C.Lalthanmawia chuan he ruahmanna kaltlangpui a nih tur thu hi Zirtawpni khan chanchinbumite a hrilh a ni.
Taxi-te chu pawl thumah ṭhen an ni anga, A, B leh C-a thliar hrangin thlasik (November leh February inkar)-ah zing dar 8:30 leh tlai dar 5:30 inkar chhungin an intlan chhawk anga hun dang zawngah chuan zing dar 8:30 leh tlai dar 6:30 inkar chhungin an intlan chhawk ang. Pathianni leh sawrkar chawlhah intlan chhawk a awm lovang a, Inrinni-ah chawhnu dar 1 thleng intlan chhawk a ni bawk ang.
Hetihlai hian Taxi neitu leh khalhtu insuihkhawm pawlte chuan intlan chhawk tura sawrkarin ruahmanna a siam hi an dodal a. Vawiin hian an duhlohzia entirna’n Aizawl khawpui-ah kawngzawh an tum nia thu dawn a ni a. Taxi-ah te hian puan dum an tar mek bawk a ni.