Taxi neitu leh khalhtuten an harsatna sawi chhuak

Zoram Taxi Drivers’ Association (ZTDA) leh Zoram Taxi Owners Association (ZTOA ) chuan Taxi-a eizawng te sawrkarin a enkawl dana harsatna an tawh chi hrang hrang te nimin khan Aizawl-a thuthar lakhawmtute an hrilh.

He hunah hian ZTDA leh STOA hruaitute chuan State Transport Authority (STA) in an tana ro an rel aṭanga an thil tawn chi hrang hrang sawifiahin, All Mizoram Plying Permit kumkhat atana `1,000/- pek ṭhin tihtawp sak a, Road Permit lak chawp a ngai ta leh Road Permit la tur hian Office hawn hun chhung chauha a lak theih si chuan Emergency-ah a buaithlak hle tih an sawi a. Chhiah (Road Tax) a sân ruala Life Time Tax lâk chu an tlin loh tur a ni tih a chian thu sawiin, an thawhchhuah a tlem si a,Tax a rawn sânna hi za a 6 lai chu an tan phurrit a tlin takzet avangin sawrkar chuan ngaihtuaha sut sak leh hram se an duh tih an sawi a ni.

Kum 10 kai chin Taxi hlui a thar a thlak phalna tihtawpsak chuan an eizawnna a tibuai hle tih an sawi bawk a. Heng bakah tunhnaia Co-Ordination Committee on Traffic Management chuan Aizawl khawpui tawt lutuk tihziaawm nan leh mipui vantlang him zawk nan’ tia Taxi te intlanchhawk turin a rel chu an duhlo thu sawiin, chhiah tuk ṭeuh laia hnathawk tlem zawnga hma laksak an ni leh si chu hriatthiam har an tih thu leh siamṭha leh turin sawrkar khawngaihna leh zahngaihna an ngen tak meuh meuh tih an sawi ani.

Hetihlai hian, Aizawl Taxi Workers Union te chuan taxi intlanchhawk tura sawrkar ruahmanna chu zawm an tum lo tih nimin khan thuchhuah siamin an sawi bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram