Serchhip District chhunga Keiṭum leh Khawlailung inkara awm, Tuichang Lui, Keitum Branch YMA ten an humhalh chhunga nungcha te chu mi tutih hriatloh ten Tûr hmangin an hrai a, lui dunga nungcha engemawzat an thi a ni.
Nimin zing lama he lui kaltlangtu khualzin veivak ṭhenkhatten luia sangha thi an hmuh aṭangin he lui dung hi tûra hrai a ni tih hriatchhuah a ni a, Keiṭum Branch YMA ten bawhzuiin, nimin chhun dar 12:30 vel khan a hmunah thil awmdan an enfiah a, heng sangha hraite hi Pathianni lama inṭan niin an ring a ni.
Tuichang leh Keiṭum Branch YMA te chuan he lui an humhalh chhunga Sangha leh nungcha dang thi te chu a theih ang ang lakhawmin, zirchian turin Serchhip lamah te a ṭhen thawn phei nghal a ni a, Serchhip District Bawrhsap pawh hriattir nghal a ni bawk a ni.
Luia nungchate hrai nana an hman tûr hi engang tûr nge a nih hriat a nilo a, nimin lam kha chuan he tûr hian lui dunga nungchate hi ala tirui/tibuai chho mek zel niin hriat a ni a, Nghalim leh Nghaler-in he tûr hi an haw bik niin hriat a ni a, a thi pawh hmuh tur an awm nual a, nghahhrah thi erawh nimin kha chuan hmuh a ni lo.
Kum 2009 aṭanga Keiṭum Branch YMA ten an lo humhalh tawh Tuicang Lui-a Vaipuan-pho leh Keiṭum Li inkara sangha te hi Tuichangral lam leh Tuichang Lui kântu khualzin ten hmuhnawm ti takin an lo thlir ṭhin a, hetiang a misual tutih hriatlohten tûra an lo hrai hi a rilru a na takzet a ni tih Branch YMA hruaitute leh khualzin veivak te chuan an sawiin, he thilah hian rinhlelh engmah an la neih thiamloh thu leh Serchip Police Station-ah FIR thehluh a nih dawn leh dawnloh he chanchin ziahlai hian hriat a la ni lo.
Nimin vek khan P&E Veng Branch YMA te humhalh chin, Tuikum lui, Vancheng kai thlang lamah pawh Chakai leh Kaikuang thi engemawzat hmuh a ni bawk a, hei pawh hi Pathianni-a hrai a nih rin a ni.