Union Transport Minister sawmna angin Meeting-ah tel

Nimin khan Union Transport Minister Nitin Gadkari-a sawmna angin Mizoram Transport Minister Pu John Rotluangliana chu India rama Road Transport & Highway lama thuneitu sang ber inhmuhkhawmna, Transport Development Council Meeting vawi 37-na leh National Road Safety Council (NRSC) vawi 16-na, NDMC Convention Centre-a neihah tel.
Minister Pu Johna chuan Mizoram Transport Department hmalaknate tarlangin TDC kaihhruaina anga Vehicle Lifetime tax rate thar, floor rate 6% a private motor hrang hrang atanga lak tan a nih thu leh motor registration leh road tax-te chu computerized a nih tawh thu te a sawi a. Lirthei, phal chin tawk aia rit phurte hrem an nih dan leh Mizoramin weight-bridge a la neih loh avanga voucher/challan hmanga phurh theih chin chu teh a nih dante, Mizoram Action Plan for Road Safety chu thehluh a nih tawh thu leh Rule of Road Regulation 2015 (Draft) chu a pawmpui thu a sawi bawk.

Chairman leh State dangte pawhin Mizoram Transport Department hmalakna, a bik takin Non-Transport Vehicle aṭanga tax lakna dan a tihlawh-tling thei chu an fak hle a. Pu Johna hi Minister 5 dangte nen Mizo zinga hmasa ber ni turin NSRC-ah member a ruat a ni.

Minister hi Mizorama Food Security Scheme hman tanna (launch) February ni 24, Vanapa Hall-a neih tur hmang tur hian vawiinah a rawn haw nghal dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram