Zothlifim Logo
Loading ...

Chief Minister Pu Lal Thanhawla chuan nimin khan Anti Corruption Bureau (ACB) office, New Secreatariat Complex, Khatla a an conference hallah ni thum chhung awh tur Training on ‘Anti Corruption Laws & Investigation of Cases’ chu a hawng.
Chief Minister chuan kut tlinglova sum lak luh, corruption, eirukna hi kum 2008 inthlan dawna mipuite hnenah a zung chawpa phawia phoro a nih tur thu an sawi thu leh chumi atana ACB chu Director, IPS Officer enkawlna hnuaiah Directorate-a hlankai a nih tur thu an lo sawi tawh ṭhin a ni a ti a. Corruption hian khawtlang a tichhia a, sawrkar a timualpho a, mipuiin an tuar nasa a ni a ti a. Chuvangin democracy ah chuan corruption hi ram leh hnam hmelma a ni a ti.

Chief Minister chuan hmasawnna tura project lian tak tak hmachhawpte hi kut tlinglova sum lâk duhna avangin a hun takah a zawh theih loh phah mai piah lamah, thawh zawh a nih pawhin a hna a chhe ṭhin hle a, hei hi mi hnuaihnung zawkten tuarin, an chanvo tur a ti hêk nasa ṭhin a ni a ti a. Chuvangin mirethei zawkte hian eirukna avangin heng hmasawnna tur project ṭha tak takte hian an hnen a thlen phak an ring ngam ṭhinlo a ni a ti. Hemi tireh tur hian kan zavaia kan ṭan tlan angai a ni a ti.

Chief Minister chuan Anti corruption officerte chu training an neih tur hian an thiamna leh an remhriatnate tuaihriama tichakin, an hna ṭheuh te chu felfai tak leh tlin taka zir chhuak a, thil tisualtu an hmuhchhuah te chu hrem an nih ngeina turin thlei bik neilo leh huaisen taka thawk turin a chah a ni.

Chief Minister chuan ACB officer te leh Mizoram Police te tana Aizawlah ngei Central Bureau of Investigation (CBI) Instructor 3 – CBI Academy, Ghaziabad aṭanga traininig pe tura Chief Secretary leh Director ACB te hmalakna chu fakawm tiin, lawmthu a sawi a, CBI Instructor lokal te hnenah pawh lawmthu a sawi bawk a ni. Hetiang training ACB in alo kalpui tawhah training la tuten an hlawkpui hle tih Chief Secretary leh Director ACB ten an sawi chu thil lawmawm tak a ni tiin, training nei tur zawng zawng te chu duhsakna a hlan a ni.

Hawnna inkhawmah hianPu Ajay Keshyap, IPS, Director, ACB-in kalkhawm te lawmna thu sawiin, Chief Minister-in sawrkar ṭha leh felfai, langtlang leh mipui nel ngam siam a duhna chu ropui a tih thu a sawi a. Tum ṭum training hi ṭum 4 na niin, Training neih turah kawng tam tak, technical lam thlenga zirtirna pek a nih tur thu a sawi a. Tun ṭumah hian mi 40 vel hnenah training pek a ni ang a ti.

Chief Minister hi Lt Col (Rtd) ZS Zuala, Parliamentary Secretary-in a ṭawiawm a ni.