Ruihhlo kaihhnawih leh HIV chungchanga kum 5 chhung hmalakna tur Project Sunrise chu nimin khan Health Minister Pu Lal Thanzara’n a hawng a, Project Sunrise hi tun thla ni 6 khan Union Health Minister in Imphal,Manipur ah ram pum huap in a lo hawng tawh a ni.
Health Minister chuan, kum 1999 aṭang daih tawh khan Health Deptt. hnuaia MSACS kaltlangin HIV kai thei din-hmuna dingte enkawlna kawnga hmalakna kalpui tawh a nih thu leh tunah phei chuan District tina inzar pharh in HIV darh zel tur venna kawngah chak taka hmalak a ni a ti a, nundan phung thalo avanga HIV kai awlsamte zinga hmalakna Harm Reduction Strategy hrang hrang – Needle Syringe Exchange Programme, OST leh Condom Promotion te chu a dodaltu nilova, hrethiama, thlawp tlattu nih a pawimawh a ti a, heng mite himna hi mi zawng zawng himna a nih zia leh thangthar lo la awm zel turte tan pawh HIV laka himna kawng pawimawh tak a ni a ti.
Health Minister chuan tun aia nasa hian NGO leh Koh-hran te pawh in hemi chung-chang hi sawi darh se, ram dinhmun leh ṭhalai tam takte nun kawng chhiat phahna a nih thu nasa taka puanzar ni theise a duhthu sawiin MLA zawng zawngte pawh hian mahni bial theuhah hma lain awareness lamah tan lak ni thei se a duh thu a sawi bawk.
Project Sunrise kalpuitu ber chu Family Health International a ni a, hmarchhak state 8 ah National AIDS Control Organization (NACO) leh State tin AIDS Control Society te thawhpuiin hma a la tan mek a, Project Sunrise hmalakna atana sum tumtu ber chu Centre for Disease Control a ni.