Environment & Forest dept-in report an dawn chinah tun tleng hian Mizoram State Animal, Saza thi ruang 94 chhar a ni tawh a, Aizawl Sahuan (Zoo) a Saza nupa dah zinga a ‘nu’ zawk pawh thi tawhin, a ‘pa’ zawk erawh chhanhim theih a ni.
Saza hi India rama ramsa humhalhna Dan (Wildlife Protection Act, 1972) hnuai ah ramsa humhalh ngai berte zinga mi niin, Schedule-I ah dah a ni a. Saza natna hi hriat chhuah tuma engemaw chen investigation a awm tawh hnuah Goat pox ni ngeia hriat a ni a, tunah hian zirchian mek zel ala ni.
Goat pox hi Capripox virus-in a thlen a ni a, he natna hrik (virus) hi Kel, Beram leh Bawng ten an pai thei a. India ram hi he natna hri lenna hmun (endemic area) ah puan ni mah se Mizoramah hian tunhmain he natna hi a awm tih hriat emaw hmuhchhuah emaw a la awm lo a. Kel (goat) leh Saza (serow) te hi inhnaih tak an ni a, hei vang hian tuna natna hri leng pawh hi Kel atanga kaidarh a nih theihna a tam hle niin, hemi lama mithiamte chuan an sawi.
Mizoram State Animal Saza thi ruang hi nikum kum chanve chho vel atang khan Mizoram hmun hrang hrang-ah chhar/hmuh tur a awm tan a, Saza thi ruang lak leh a sa zawrh pawh tunah hian district hrang hrangah khap mek a ni.
Environment & Forest departmentin tun thleng a report an tawn chinah Saza thi ruang hi 94 zet chhar a awm tawh a, report bak hi engemaw-zah thi an awm ngei rin a ni bawk. Aizawl Sahuana dah Saza 2 zinga pakhat chu nikum September thla khan hrileng vang hian alo thi tawh a, Sahuan enkawltu Forest Dept thawk-tute sawi danin, Sahuan a Saza dah pahnih te hi a nu leh a pa an ni a, an pahnih hian hri lengin man ve ve in, a pa zawk an enkawl dam theih laiin, a nu zawk erawh a thi a, Sahuan a Saza an dah pahnih zinga a nu zawk a thih tak avang hian an inthlahpun zelna tur kawngah tunah hian harsatna an tawk mek niin an sawi.