Sumdawn nana hman lirthei te Service loh tum

Lirthei hmanga eizawngtu Pawl hrang hrang inzawm-khawm Commercial Vehicle Joint Action Committee (CVJAC) chuan an eizawnna kawnga sawrkar thutlukna chi hrang hrang avanga harsatna an tawh thu sawiin, vawiin hian an lungawilohna lantir nan an hna chawlhsan an tum tih an sawi.
Nimin khan Aizawl thuthar-lakhawmtute he thu hi hrilhin, Taxi intlan chhawk tur emaw, Chhiah tihsan leh Lifetime Tax hman tur duh lo ringawt an ni lova, a phena thil inthup leh hriatthiam loh an neih te sawihopui tura sawrkar an karna tihhlawhtlinsak an ni lo chu an hrethiam lo tih an sawi.

An harsatna zingah Lifetime Tax, Private vehicle-a tih hmasaktir hnuah Commercial Vehicle te Road Tax za-a 50 velin a tihsân sak bakah Lifetime Tax za-a 6 chu tun dinhmunah India ram State tam takin an la hmang chuang lo chunga chhiah thar emaw pawisa chawi ngai thar a awm apianga hmang hmasa pawl nih tum ziah a, an hamṭhatna tur leh mipuiin an chhawr ṭangkai theih-na tur a vuaicha leh viau ṭhin si te chu ṭha lo an ti tih an sawi.

Chetsual palh thuah kum 15 atana Lifetime Tax lo pek tawh refund theih a ni lo tur leh an eizawnna chhunzawm nana Motor dang lei leh theihna tur Replacement Permit pawh tihtawp zui a ni chu Lirtheia eizawngtute tan chuan Order lungchhiatthlak takzet a ni an ti a, Loan-a lirthei lei
tan phei chuan chem lova lu in lâksakna a ni ringawt a ni an ti a. Hemi bakah hian a pek dan turah Lifetime Tax a nih avanga vawi leh khata pek nghal kher tur tihna a nih chuan loh avangin Installment-a pek theih dan siam hmasa se an duh tih an sawi a. Motor man aṭanga chhuta Lifetime Tax lak tum phei hi chu thil dik a ni lo hrim hrim a ni an ti.

All Mizoram Taxi Permit tihtawp avanga Aizawl pêla tlân dawna Special Road Permit lak zel angai tur chuan harsatna a thlen dawn tih sawiin sawrkar chawlh leh zanah te Road Permit lâk kher a ngai lo tih chu ziak ngeia dah ngam nise an ti bawk.

Hetihlai hian vawiin aṭanga Aizawl khawpuia Taxi intlan chhâwk tur leh an harsatna hrang hrang tawh avanga lung-awilo Taxi hmanga eizawng pawl hrang hrang te chuan nimin khan Aizawlah kawng an zawh a, Zoram Taxi Owners Association (ZTOA), Zoram Taxi Drivers Association (ZTDA) leh Zoram Taxi Workers Association (ZT WA) member te an ni a, Vanapa hall kawt aṭangin Chanmari kawn thleng kawng an zawh a, All Mizoram Permit Cancel an duhloh thu te, taxi hlui emaw chhia thlak theihna tihtawp an duhloh thu te, Lifetime Vehicle tax chawitir an duhloh thu leh Taxi intlanchhawk tura hmachhawp mek an duhloh thu an auchhuah pui a ni.

Taxi-a eizawngtu pawlte hian vawiin aṭangin sawrkar aṭanga thuleh awm hma chu tumah Service lova chawlh nise an ti a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram