Mizoramah sikserh natna vei tlahniam chho zel

India khua leh tuite’n hriselna kawnga hma an sawn nana sawrkar laipui hmalakna pakhat National Health Mission (NHM) hnuaia Mizoram State Vector Borne Diseases Control Programme (MSVBDCP) hmalakna leh tlawmngai pawl hrang hrangte inpekna leh mipui ṭawiawmna avangin Mizoram-ah Sikserh natna vei an tlahniam chho zel.
He thu hi NHM hnuaia Information Education Communication (IEC) hotute sawidan-in, Mizoramah Malaria natna vei leh Malaria vanga thihna zawi zawiin a tlahniam telh telh, an ti a. Kum 2014-2015 chhung khan Mizoram Malaria tlem zel tura an ngaih laiin a pung chho hluai a, amaherawhchu, kum 2016-ah Malaria vei leh Malaria vanga thihna nasa takin a tlahniam ve thung a, kum 2015 aṭanga 2016 chhunga Malaria vei tlakhniamna hi za zelah 71.28 a ni a, Malaria vanga thihna hi kum 2015 aṭanga 2016 chhunga a tlakhniamna chu za zelah 57.14 a ni. Malaria vanga thihna a tlakhniamna chhan ni a lang chu Thosilen damdawia chiah sa (LLIN) sem vang leh mipui ṭawiawmna vang nia a lan thu leh LLIN hi 2016 khan Mizoram khaw 731 ah sem a nih thu IEC Consultant chuan a sawi bawk.

Kumin January aṭanga March thla thleng khan Thisen exam 35,801 a ni a, heng aṭang hian Malaria vei mi 582 hmuhchhuah an ni a. Kum dang aiin case hi a tla hniam hle tura ngaih a ni.

Malaria natna laka mipui an him theih nan State Vector Borne Diseases Control Prog-ramme chuan nasa takin hma a la mek zel tih sawiin IEC Consultant chuan Malaria natna bik zawn chhuah leh enkawlna turin ASHA leh CHV, Sub Centre, PHC tinah thisen exam-na leh Malaria damdawite dah a nih mai bakah Aizawl Civil Hospital leh Lunglei Civil Hospital te chu Sentinel Surveillance Hospital atan kum 2011 aṭang khan Central sawrkarin a rawn thlang a. Tunah hian District tinah Sentinel Surveilance Centre buatsaih a ni tawh bawk a, Sentinel Surveillance-ah hian Medical officer leh Laboratory Technician pakhat zel dah an ni a.

Malaria laka mipui him theih nan kum tin vawihnih DDT kah ṭhin a ni a, a thawh khatna zo fel tawhin June leh July-ah a thawh hnihna ṭan a ni leh dawn a ni.

Malaria laka inveng turin in leh a vel tihfai ṭhat te, tui tlin theihna reng reng tihbo te, bawlhlawh paih dana fimkhur te a ngaih thu IEC hotute chuan an sawi a. Zan mutnaa thosilen zar te leh ram riak mi tan pawh thosilen zar ngei ngei a pawimawh hle a. Thosilen mai bakah thosi hnawt kiang thei mosquito repellent te leh a hnawih chi leh inchulh chi cream te pawh a ṭangkai hle a, an ti.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram