Tunlaia Mizoram Health Multipurpose Services Association (MHMSA) Member-ten sawrkar laka an lungawi-lohna lan tir nan nawrh an huaihawt mek chungchangah Health & Family Welfare Department chuan thuchhuah siamin, MHMSA member te chu an hna zawn thuai tura an duh thu an sawi.
Thuchhuah an siamah chuan Health Worker aṭanga Health Supervisor-a kaisan danah za-a 75 (75%) chu Seniority-a kai san ni se, a bak 25% chu limited departmental exam-a a ti tha apiangte kai ni se tih 2011 Recruitment Rules a awmsa chu a ṭha tawkin sawrkar chuan a hria tih an sawi a, hei hi a thawksa te zingah inelna thianghlim a awm theih na tura duan a ni a, MHMSA chuan he 25% LDE hi duh lovin 100% Seniority a kai ni se an ti a, heti a nih chuan mi thiam leh thluak ṭha, taima bawk si tan phurna (incentive) a tlahniam ang tih department chuan a hlau a ni, an ti.
Health Supervisor atanga Community Health Officer (CHO) a kaisan chungchang pawh Mizoram Health Multipurpose Services Association te chuan 100% (za-ah za) Seniority a kaisan ni se a duh a, tuna recruitment rules, 2011 hman mekah chuan 25% seniority promotion, 50% LDE leh 25% direct recruitment te a ni a, 50% LDE-a promotion hi 25% a tihhniam a, 25% seniority a kaisanna hi 50% a tihsan ve thung turin department in rawtna a siam a, he rawtna hi DP&AR(GSW) pawhin ṭha tawka hriain Law & Judicial Department in a ṭul ang a hma an lo lak tura thawn mek a ni a. Hei hi a hlawhtlin chuan seniority a kaisanna 25% chu 50% ah a kai chho dawn tihna a ni a, tun dinhmunah a tha tawk rihin department chuan a ngai tih an sawi a, hengte vang hian MHMSA Member-te pawh an nawrhna te titawp a, an hna zawm thuai turin sawrkar chuan a duh tih an sawi.