Lai Autonomous District Council (LADC) Budget Session tawp ni nimin khan kum 2017-18-a LADC sawrkar sum hman tur Rs.133,59,40,000/- pass a ni.
LADC Emergency Budget Session ni 3 chhung awh hi Thawhlehni khan ṭan a ni a. Session ṭan ni hian CEM Pu T. Zakunga’n Budget a phgharh a, nimin khan Budget hi a tlangpuia sawiho a ni a. Eptu member-te Emergency Budget Session koh a nih dana lungawi lovin House aṭangin an chhuak a, eptute tel loin sawihona hi neih chhunzawm a ni a, nimin khan Budget hi buaina awm lovin pass a ni ta a ni.
Nimina LADC Session-ah hian Deputy Chairman atan Lawngtlai AOC bialtu MDC, Independent candidate, Congress Legislature Party thlawptu Pu LR Dingliana Chinzah, chuhtu awm lovin thlan tlin a ni a. Hemi hnu hian Chairman Pu V. Zirsanga’n tluang tak leh harsatna em em awm lova session an nei thei chu lawmawm a tih thu sawiin, hun lo la kal zel turah pawh lungrual taka thawkhoa session neih leh theih a beisei thu sawiin tiamchin awm lovin session hi a titawp a ni.