Aizawl-a Transport Directorate Building thar hawng

Cheng nuai 500 chuang senga sak, Aizawl Vanapa Hall bula Transport Directorate Building thar chu nimin khan Transport Minister Pu John Rotluangliana’n a hawng.
Building thar hawnna inkhawmah hian Transport Minister Pu John Rotluang-liana chuan MST bus-te chu hlawkna ûma tlantir tur an ni lo a, mipui phurrit chhawk zangkhai tura man tlawm taka tlan tir ṭhin an ni zawk a ti a. Chaltlang Transport Office tual zawla consumer petrol pump chu retail outlet a leh tum a ni thu te; Hlimen-a Automated Vehicle Inspection Centre sakna tur sum cheng nuai 1500 chu sawrkar laipuiin a pawm tawh thu te leh Deptt hmachhawp langsar zualte a sawilang a ni. Parliamentary Secretary Pu TT Zothansanga pawhin thu a sawi a ni.

Transport Department hi kum 1972 ah Supply and Transport Department tia ding ṭanin kum 1985 khan tuna an sak ṭhat tak Directorate building awmna hmunah hian Joint Director hovin an ṭhu a. Directorate hranga a din hnuah pawh engemawchen helai hmunah awmin kum 2005 khan  Disater Management-in a him tawk tawh lo nia hriain thiat turin hriattir a, Directorate building sak ṭhat nana sum ruahman hmasa ber chu cheng nuai 393.3 niin a sak pum nan cheng nuai 133.72 chu sawrkarin a pek belh a ni.