State Level Bankers Committee nimina Aizawla ṭhu-khawm chuan Mizorama Bank awmte zinga CD Ratio bituk 20% loan pe phak lo te chu kumin September thla ral hmaa bituk chin phak ngei turin a hriattir.
Chief Secretary, Pu Lalmalsawma kaihhruai State Level Bankers Committee ṭhut-khawmnaah hian kum 2016-17 chhunga Mizorama Bank-te hnathawh dan thlirlet a ni a, Bank zinga CD ratio bituk zaa 20 phak lo te hi Yes Bank, ICICI Bank, Federal Bank, South Indian Bank leh Axis Bank-te an ni. Bank hrang hrang dinhmun khaikhawmin Credit Deposit Ratio hi tun dinhmunah 39.88% a ni a, hei hi nikum March thla aiin zaa 4.31 in a hniam zawk a, Mizoram District zingah CD ratio hi Siaha District-ah sâng berin, 115.25% a tling a, a hniamna ber Aizawl District-ah 32.65% a ni.
SLBC ṭhutkhawma tarlan a nih dan chuan sawrkar kum kalta 2016-17 chhung khan Mizorama Bank awm zawng zawngte deposit dawn chu cheng vaibelchhe 7902.43 a ni a, sum pûk chhuahtir belh khawm chu cheng vaibelchhe 3151.12 a ni thung a, Agriculture Loan chu 18% tal tling tura tih a nih laiin 5.55%, cheng vaibelchhia 174.94 chauh a tling phak a, Bank te hian 12.45%-in Agriculture Loan bituk zat hi an phak lo a ni.
2016-17 chhung hian loan pekchhuah zat chu cheng vaibelchhe 1268.75 a ni a, Annual Credit Target chu 14.98% in khûm a ni a, 2016-17 chhung hian MSME (Micro Small and Medium Enterprises) loan chu cheng vaibelchhe 109.88 in a pung a, MUDRA loan mi 3929 hnenah cheng vaibelchhe 94.57 pek a ni a, Stand Up India scheme hnuaiah loan mi 53 hnenah cheng vaibelchhe 10.98 pek a ni a, chung zinga mi 16 chu hmeichhia niin cheng vaibelchhe 4.06 pek an ni.
SLBC meeting kaihruaitu Chief Secretary Pu Lalmal-sawma chuan National Livelihood Mission hnuaia loneitute tana dahkham ngailova loan lak theihna chu ngaipawimawh turin Bank hrang hrang hotute a hrilh a ni.
He meeting-ah hian Bank hrang hrang aiawhte, Mizoram sawrkar hnuaia department ṭhenkhat aiawhte bakah Mizo-ram pawn lam aṭangin RBI leh NABARD hotute an tel a ni.