Chhingchhip Lei (Bailey Bridge) hêlna kawng siamna tura chhungkaw pariat, Compensation la fel thlap tawh ten an In an ṭhiah loh avangin hnathawh ṭan theih loha awm chu an in te ṭhiatin Chhingchhip lei hêlna tur kawng siam thuai a ni dawn.
Hemi chungchangah hian Serchhip DC Pi Sangchhin Chinzah-in Sub-Hqrs. YMA Serchhip Vigilance & Monitoring Committee te Compensation vanga harsatna siam te dawr tura a ngen angin Sub-Hqrs. YMA Serchhip Vigilance & Monitoring Committee Chairman Pu Kapliana Pachuau leh Sub-Hqrs YMA President Pu R.Sanghmingthanga hovin hruaitu rual ṭhahnem tak ten Pathianni tlai khan heng chhungkua te hi an Inah kalchilhin an dawr kual a, boruak ṭha tak hnuaiah inbiak-na hi neih a ni a, tunkar chhung-in heng chhungkaw 8 te hian an In an ṭhiah fel beisei an ni.
Hetihrual hian Er. K.Sawmvela, Chief Engineer, PWD (Highway) pawhin Chhingchhip Lei hêlna tur lai tura Contractor an thlan tawh chu hna ṭan nghal tura a hrilh tur thu Sub-Hqrs YMA hruaitute hi a lo hrilh a ni.
Hetihrual hian Chhing-chhip Mualpuia lei (Bailey bridge) dawhnaa lei innghahna kawng chhuat tla hniam avanga harsatna pawh sut kian tuma beih zel a ni a, he thir lei hi zawm sei tum a ni a, a zawmna tur hmanrua an neih ang angte dap khawm a nih bakah, Border Roads Organization hnuaia Project Pushpak-in Buichali lei dawhna atana an hman, lei chhuat phah thir phekte chu phawh then a ni a, Inrinni leh Pathianni khan Buichali lei dawhna hmanruate hi phurh chhoh a ni a, Pathianni aṭang khan Er. K.Sawmvela hovin Lei zawm sei leh tihchak (Strengthening) hna an thawk ṭan nghal a, khua in a zir chuan ni 2/3 chhunga zawhfel an inbeisei a ni.