CM hovin Lengpui Airport chungchang sawiho

Nimin khan Chief Minister Pu Lal Thanhawla, Chief Secretary Pu Lalmalsawma leh Department ṭhenkhat Secretary te chuan Lengpui Airport chungchang sawiin Chief Minister Office-a Cabinet Room-ah meeting an nei.

Meeting-ah hian Lengpui thlawhna ṭumhmun enkawlna chungchang sawiho a nih hnuin tun dihmunah Mizoram sawrkar kutah awm chhun-zawm se tih rel a ni a, Airport chhunga boruak tih daih dan te, Terminal building cheiṭhat chungchang te, zana tlawhna ṭum theihna tur night landing chungchang te leh runway kaihhnawih thil te, Airport enkawlna atana GAD Aviation Wing a thawktu mamawh belh chungchangte pawh meeting ah hian sawiho a ni.

Lengpui Airport hi December ni 12, 1998 khan commissioned a ni a, a design hian zin veivak lut leh chhuak 300 ve ve dawl tura ruahman a ni a, tunlai hian nitin zing vei vak mi 900 (lut leh chhuak) velin Airport hi an hmang mek a. Air India, Jet Airways leh Indigo Airlines thlawhna ten zin veivak te an phur mekin hna an thawk a. Indigo Airlines bakah Regional Connectivity Scheme (RCS) hnuaiah Zoom Air, Deccan Charters leh IIC Technologies Ltd. ten flight operations tan tumin hma an la mek a ni.