Skip to content
Home » Chanchinthar » Eirukna thilah sawrkarin mi 1500 chuang chungah kut a thlak tawh:Chief Minister

Eirukna thilah sawrkarin mi 1500 chuang chungah kut a thlak tawh:Chief Minister

Chief Minister Pu Lal Thanhawla chuan kum 9 chhungin hreh tak chungin sawrkarin mi 1500 chuang chungah eirukna thilah kut a thlak tih a sawi a, hengte hi sawrkar ṭha an duh vanga tih ngai a ni, a ti.
He thu nimina P&E Veng, Serchhip-a Economics & Statistics Department hnuaia District Research Officer’s Office Building sak thar a hawnnaah sawiin, Chief Minister chuan sawrkarin eirukna corruption a haw hle tih sawiin, eiru te hrem duh loah sawrkar hi sawi a ni ṭhin a, mahse thubuaiin court a thlen hian sawrkarin thu a nei tawh lo a ni a ti.

Chief Minister chuan hmasawnna ṭha nei turin ruahmanna (planning) felfai tak neih a pawimawh a, chumi atan chuan statistics leh thil reng reng chhinchhiah hi thil ṭul leh hmanraw pawimawh ber a ni a, ruahmanna ṭha, felfai leh changtlung tak hi statistical data-ah a innghat a ni, a ti a. Chutiang a nih avangin he office pawimawh tak hawn hian District mai ni lo Mizoram hmasawnna turin ṭangkaina leh hlawkna a neih a rin thu a sawi a, kumtin Budget pharha a ruala economics lama ram ṭhan-na bu Economic Survey tlang-zarh hian statistical data pawi-mawh zia a hril tih a sawi bawk.

Pisa dawr leh inenkawlna chungchang sawiin Chief Minister chuan sawrkar hnathawk leh pisa te hi dawr nuam an ni tur a ni a, chumi rualin mipui tana an hnathawh te hi a langtlang-in, an thil tihah, a bik takin sum leh pai enkawlna lamah an thiltiha mawhphurna an la tur a ni a, hetiang zawnga sawrkar kal hi an duhdan a ni a ti a, hun vawn dik kawngah pawh hma kan sawn a, heng zawng zawng hi a hlawhtlin zawk nan sawrkar siamtu leh neitu mipui an pawimawh a ni, a ti bawk.

Serchhip District chu ram laili a nih avangin kawng hrang hranga duhsakna dawnga an vanneih thu sawiin, heng hmasawnna hi neitu rilru pua lo dawngsawnga hmuak thiam  turin District mipuite a chah a, hemi atan hian an rilru leh ngaih-tuahna te tihzauh leh tihchang-kan a pawimawh thu a sawi.

Dr. C. Vanlalramsanga, Secretary, Planning kaihhruai DRO Office hawnnaah hian hun hmanpuitu dang Finance Minister Pu Lalsawta pawhin thu-sawiin sawrkar programme New Economic Development Prog-ramme (NEDP) tum leh hemi hmanga Mizoram tihhmasawn tum dante a sawi a, Pi Sangchhin Chinzah, DC, Serchhipin lawm-thu sawiin hun a khar a ni.

DRO Office, Serchhip hi kum 2013-a hawn niin, an Office building thar sak hna hi November 2015-a ṭan a ni a, April 2017 khan sak zawh a ni a,. Office hi Mizopa chhiarin chawng hniha a sak niin, basement sak tel a ni bawk a, Building dung hi feet 82 niin a vang hi feet 30 a ni a, a floor area zau zawng hi square feet 4979 a ni a. A satu hi AIE Construction niin cheng nuai 60 senga sak a ni a, a sakna ram hi Soil & Water Conservation Department in an sahthlak a ni.

Leave a Reply

This site uses Akismet to reduce spam. Learn how your comment data is processed.