Green Mizoram Day hman dan tur rel

Thawhṭanni tlai khan District Level Green Mizoram Committee, Serchhip District chu an Chairman, District Bawrhsap Pi Sangchhin Chinzah hovin a pisaah ṭhukhawmin Serchhipa Green Mizoram Day, 2017 hman dan tur an rel.

Pi Sangchhin Chinzah chuan, thing leh mau te an chereu zel avanga kan tawrhna hi khawvel huapa kan thlir thiam lo a nih pawhin kan ngaihven duh a nih chuan kan hrethiamin a rinawm. Hman ni lawkah chuan kan chenna in te, kan pisaah te Fan vuah a ngailo, boruak a nuam tawk kan ti ṭhin a. Mahse tunah chuan Fan vuah mai duh tawk lovin chhungkaw tam tak chuan Air Condition (AC) kan lalut fur tawh a, hei vang hian thing leh mau humhalhna kawngah nasa zawka kan ṭhanharh a ngai a, Green Mizoram Day hnuaiah Serchhip leh a chhehvel hi a zau thei ang ber a hring vek ngei tur a ni, a ti.

Kumin Green Mizoram Day hi Pathianni a nih avangin June ni 9 (Zirtawpni) hian hman a ni dawn a, nikum khan State Level-in Thenzawla an hmannaah District-a tel a nih avangin nikum lamah District Level Committee pualin thingphun a ni lova, hei vang hian kuminah chuan kum 2015-a Department hrang hrangten chan pual neia thing an phunna Zawlpui kawng leh Eklavya School Compound-a hma lak tawhna te ûmzui tura ruahmanna siam a ni a, a ṭul anga phun belh leh hung ṭhat hna thawh a ni dawn a, a hawnna inkhawm tawi hi Zawlpui kawnga DC Plot Area-ah zing dar 10-ah buatsaih a ni ang a, chumi hnuah Department tin ten an chanpual theuh te an pan nghal dawn a ni.

District Level Committee-in ruahmanna a siam lai hian State Level ruahmanna la hriat kim chiah loh deuh a nih avangin State Level ruahman dan a zira a ṭul anga tihdanglam theih tura dah a ni bawk.