Home Minister hovin SEGC thukhawm

State Employment Guarantee Council chu an Chairman Rural Development Minister Pu R. Lalzirliana kaihhruaiin niminpiah khan Aijal Club Conference Hall-ah Mahatma Gandhi National Rural Employment Guarantee Scheme (MGN REGS) hnuaia ngaihtuah tur thu pawimawh hrang hrangte sawiin an ṭhukhawm.

He hunah hian Parliamentary Secretary Lt. Col. (Rtd.) Z.S. Zuala chu a tel bawk.

Nimin meeting-ah hian VEC ṭhiah (dissolute) a nih thula a thuneihna te BDO/ Programme Officer emaw Advisory Committee hnena hlan chhâwn dan tur kalphung te, kum 2014-a SEGC Meeting-in Material Sharing Component a lo ruahman tawh (DRDA – 40%; BDO – 40%; VEC – 20%) ennawn chungchang te leh Mizoram MGNREG Scheme 2014, section 31 hnuaia 1% labour cess lak tur tih dân awm (a taka hman loh) chu sawrkar laipui Ministry aṭanga 18.7.2016-a lehkha lo thlengin a rawn tihtawp avanga he inkaihhruai-na siamṭhat chungchang te ngaih-tuah a ni a, heng bakah hian Social Audit Unit Annual Report chungchangte sawiho a ni.

Kum 2016-2017 chhung khan MGNREGA atan sawrkar laipui atanga sum hmuh chu cheng nuai 14451.26 niin, State Matching Share chu cheng nuai  349.001 a ni a, kumin sawrkar kumah hian 1st Tranche atan installment hmasa ber tur chu sawrkar laipuiin April, 2017 khan Mizoram tan cheng nuai 13449.09 a tichhuak a. Heihi May ni 8, 2017 khan district tinah semchhuah vek tawh a ni.