Nimina Aizawla Statistics Day vawi 11-na hmannaah Statistical Handbook Mizoram 2016 chu tlangzarh a ni a, he lehkhabua tarlan a nih dan chuan Mizoramah mihring 10,97,206 an awm a, a zatve aia tam, mi 5,71,771 chu khawpuia cheng an ni a, thingtlanga cheng chu mi 5,25,435 an ni.
Mizorama cheng zawng zawng, mi 10,97,206 zingah hian mipa 5,55,339 an ni a, hmeichhia chu 5,41,867 an ni a, hmeichhia aia mipa an tam zawkna hi 13,472 a ni a, mipa 1,000 zelah hmeichhia 976 an awm ang a ni.
Mizorama Kohhran lian zualten Missionary an châwm zât chu a ngheta thawk mi 2,457 leh a nghet lova thawk mi 1,581 an vaiin mi 4,038 an ni a, Mizoram Synod chuan missionary 1922 chawmin Baptist Church of Mizoram chuan 1098 an chawm thung.
Mizoram Presbyterian Synod chuan member 5,98,758 neiin member ngah ber a ni a, a dawttu Baptist Church of Mizoram chuan member 1,67,815 a nei a, a pathumna UPC North East India chuan member 1,00,063 a nei a ni.
Nimina Directorate of Economics & Statistics (DE&S) Conference Hall, New Secretariat Complex, Aizawl-a Statistics Day hmannaah hian Dr.C.Vanlalramsanga, Secretary, Planning & Programme Implementation Department chuan Statistical Handbook Mizoram 2016 bakah hian Meteorological Data of Mizoram 2016 leh NEDP hmalakna hnuaia Strengthening of Statistical Data kalpuina aṭanga siam District 8 chhunga zirchianna, BPL Baseline Survey 2016 te chu a tlangzarh nghal a ni.