Skip to content
Home » Chanchinthar » MLPC Act khauh taka kalpui chhoh mek a ni:Home Minister

MLPC Act khauh taka kalpui chhoh mek a ni:Home Minister

Minister leh Excise Minister ni bawk, Pu R.Lalzirliana chuan Mizoram Liquor Prohibition & Control Act, 2014 kenkawh kawngah sawrkar chu mipui duhkhawp a tling lo nia hriatna a awm avangin tunah hian khauh taka kalpui chhoh mek a ni, a ti.
Pu Lalzirliana chuan nimina Congress Bhavan inkhawmah he thu hi sawiin, MLPC Act chu hmanhmawh taka duan ni mahse Dan ṭha tak mai, sawisel tur awm lo, Assembly-ah pawh sawiselna ṭawngka hriat tur awm lo khawpa ṭhaa duan a ni a ti a. Amaherawhchu sawrkarin a han kalpui chho a, a ṭha viau dawn a hriat a nih laiin, sawrkar lamin he Dan kenkawh kawngah khauh tawk lohna a neih avangin sawisel a kai chho ta a ni a ti a. Hetiang avang hian tunah chuan khauh taka kenkawh chhoh a nih bakah Act-a awm chiah lo, mahse Executive Order anga ngaih theih, wine shop neitute leh a rûka hralhtute lo puitu Excise constable te hrem dan siam a ni tawh tih sawiin, wine shop neitute pawh dan lova zu an hralh tih hriatchhuah a nih chuan an license suspend leh cancel sak theihna order tihchhuah tawh a nih thu a sawi bawk. Wineshop neitute chu dan lova thil an tih a, manchhuah an nih chuan thla 3 chhung an license suspend tur a ni a, vawi hnih man chhuah an nih chuan an license cancel sak tur an ni. Tunah hian dân lova zu hralh, wine shop neitute pahnih license chu thla 3 chhung atan suspend sak mek an nih thu Pu R Lalzirliana chuan a sawi a ni.

Home Minister Pu R Lalzir-liana chuan tunkar chhova khuarel chhiatna Mizoram hmun hrang hranga thleng chungchang sawiin sawrkarin pawi a ti em em a, Cabinet Meetingah pawh chhiatna avanga nunna chante leh in leh lo chante sunna leh tawrhpui-na hun hman a ni, a ti a. Tunah hian Mizoram sawrkar chuan District tina thuneitute chu chhiat tawh dan kimchang report pe tura tih an ni a, sawrkar chuan a tih tur a ti chho zel a, sum mamawh dan azirin Delhi lamah pawh a tul chuan dil zel a ni dawn tih a sawi bawk.

Chakma Autonomous District Council-a buaina awm chungchang pawh sawiin, Home Minister chuan chinfel mai harsa deuh a a lan avangin Governor’s Rule-a dah mai sawrkar chuan tha in a hria a. Amaherawhchu an mahni lamin insiamrem thei dawn a an insawi leh tak avangin tunah hian ngaihchan mek an ni a ti a, Governor’s Rule-ah dah an la ni lo, a ti.

Leave a Reply

This site uses Akismet to reduce spam. Learn how your comment data is processed.