PWD Chief Engineer (Highway) hovin Tuikhuah Veng leh Dinthar Venga lei tlahniam a hmunah en

Nimin khan Sub-Hqrs. YMA Vigilance & Monitoring Committee sawmna tihlawh-tlingin Er. K.Sawmvela, Chief Engineer (Highway), PWD chuan Serchhip rawn tlawnin Tuikhuah Veng leh Dinthar Veng National Highway 54-a lei tlahniam (Sinking area) leh Sesah lui paltlang a NH54 kawng siam, chhe lutuk tawh te a rawn en.
Er. K.Sawmvela hi Sub-Hqrs. YMA Vigilance & Monitoring Committee-ten an Chairman Pu Kapliana Pachuau hovin Sub-Hqrs. YMA hruaitu rual ṭhahnem takin an lo dawngsawng a, Tuikhuah Veng leh Dinthar Venga National Highway tlakhniamna hmun leh Sesah lui paltlang NH-54 siamṭhat dan tur te a hmuna an enho hnuah Serchhip Bazara Sub-Hqrs. YMA Office ah hmalak zeldan tur te an sawiho zui lehnghal a, he hunah hian Geology & Mineral Resources Department Director Pu Lalhmachhuana pawhin a rawn telpui nghe nghe.

He sawihonaah hian Serchhip Tuikhuah Veng leh Dinthar Veng National Highway 54 a lei tlahniam (Sinking area) chu kuminah pawh inches 2 vela a tlakhniam belh thu leh reilote ah a mual tawlha a tawlh mai theih thu sawiho a ni a, a chhan nan tui luankawr ṭha tak leh a thlang kawr ruamah Check dam 4/5 vel siam nise, Geology & Mineral Resources Department Director Pu Lalhmachhuana’n a ranglama a zirchiang tur Geologist rawn tirh a tum thu leh chuta an thil hmuh dan Report chu PWD (Highway) Chief Engineer hnenah hian an thehlut ang a, Er. K.Sawmvela hian Ministry of Road, Transport & Highway Chief Engineer, North East Region aṭanga sum dilchhuah a lo tum tur thu te ngaihthlak a ni a. Hemi rual hian a ranglamin PWD (Highway) lamin Engineer rawn tirin Estimate leh Drawing an siam dawn bawk a, Sub-Hqrs. YMA Vigilance & Monitoring Committee te ngenna angin helai lei tlakhniamna hmun zawng zawngah hian tuiluankawr tha tak siam tura ruahmanna siam a ni bawk.

Hei bakah hian Sesah luia NH-54 chhe lutuk pawh PCC hmanga siamṭhat a nih theihnan hmalak a nih tur thu PWD(Highway) Chief Engineer hian a sawi bawk.