Ruahsur nasa avangin Zoram hmun hrang hrangah chhiatna thleng

Niminpiah aṭanga nasa ruahsur chuan Mizoram chhung hmun hrang hrangah leimin / leitawlh leh tui lian vangin chhiatna leh harsatna hrang hrang a thlen a, he thu buatsaihlai thleng hian ruahsur nasa vanga chhiatna kaihhnawihah hian mi 15 in nunna an chân tawh a, mi 11 chin hriat lohin an awm mek a, Serchhip khawpui chhungah erawh chuan leimin vanga nunna chân an awm lova, in ṭhiah erawh a awm a ni.
Serchhip
Ruah sur nasa avang leimin vang hian Serchhip Veng-chungah In pakhat ṭhiah a ni a, P&E vengah In pakhat ṭhiah ngai a awm bawk a, Chhim vengah In 4 bungrua thiar chhuah a ni a, New Serchhip Sih-phir vengah kawng chhak lei-minin in pakhat chu a bang chhak lam a tipawp nual a, nimin khan siamṭhat lehnghal a ni a, Sai-liamkawn bula NH 54 kawng ping thenfai nghal a ni a, hei bakah hian khaw chhungah leimin tenau engemawzat a awm a, heng te hi vawiin lam aṭangin PWD chuan thenfai hna thawh nghal an tum a ni.

Serchhip khawpui buh leh thlai thar chhuahna hmunpui ber pakhat Zawlpui phai chu Mat lui lianin a chim nasa hle a, hei bakah loneitute kalkaina ber Chawmkaia Mat kanna Lei (Bridge) chu tui lian hian a titlu a, lui rala hnathawka riak mi engemawzat tui lian hian a dang mek bawk a ni.

Serchhipa chhiatna tawk chhungkua te hi Serchhip DC Office aṭangin a theih chin chinah enfiah a chhawmdawl hna thawh nghal niin, leimin hlauthawn awmna hmuna awm chhungkuate chu Silpouline pek an ni bawk.

Aizawl leh Serchhip inkal-pawhna kawng NH-54-a Chhiah-tlang leh Chhingchhip inkarah lei a min avang leh Chhing-chhip khaw chhunga Thir Lei innghahna feet 2 vel laia a tlakhniam avangin lirthei tan zawh ngam a ni lo bawk a ni.

Thenzawlah pawh ruah nasa avang hian Lau lui a lian a, Thenzawl khawchhungah tui a luang nasa hle a, chhungkaw 3 in leh dawr ṭhenkhat chu tui hian sâng vakloin a chim a, Ayush Hospital leh Don Bosco School panna kawng-pui chu tui lianin a chim avang-in School hi khâr a ni a, School engemawzat chuan zirna pang-ngai kalpui thei lovin School an bang hma hlawm bawk a ni.

Aizawl
Nimin zing dar 7:30 vel khan Aizawl Saron veng, Sipai Lammual thlang chu minin, a thlanga Pi PC Sangthangi Assam type in, chhungkua 7 luah lai chu a chim a, zingkar aṭanga a chet hret hret tawh avangin in luahtute hi in chim hma hian hmun him lamah an inthiar fihlim hman vek avang-in thi leh hliam an awm lo a, bungrua erawh engmah chuh hman a ni lo a ni a, Saron veng leiminna hmun hi min leh thei dinhmuna a din avangin chhung-kua 21 bawr vel chu hmun him lam-ah an insuan chhuak tawh a ni.

Behlehem Vengah chhung-kaw 6 luahlai In 2 chu leiminin a hnawl chhia a, Bawngkawn-ah In pakhat a chhia a, Durtlang leh Aizawl inkar kawngpui thing tluin a hnawh a, Tuirial airfield kawngah kawngpui a tlakhniam avangin kawng a ping a, Zemabawk North-ah chhungkaw 8 luahlai In 5 a chhe bawk a ni.

Hunthar lei tawlhna hmun pawh ruahsur nasa avang hian che lehin NH 54 kawngpui ah chirh dur tam tak a inchhek thlak avangin lirthei pawh a inchhawka tlantir an ni a, Leitawlhna tawp ber Pi B Sairengpuii Concrete in chu tunah hian a thlang lam ban chu a inkhai deuh fur tawh a helai hnaia inṭhenkhat pawh a chet leh avangin hmun him lamah chhungkaw ṭhenkhat chu an inthiar chhuak tawh bawk. Republic veng Field chung kawngpui pawh a tlakhniam avangin lirthei eng chi mah a kal tlang thei lo a, mihring tan pawh kal tlang theih a ni lo a ni.

Nimin tlai dar 5:30 vel khan Vaivakawn aṭanga Bawngkawn panna, NH 54 ah kawng chhak lei a min a, leimin hian kawnga lirthei tlan lai 2 a chhilh nia hriat a ni a, mihirng engzatnge a delh tih hriat ala nilo.

Tlawng lui lianin Sairanga In ṭhahnem tak a chim a, In 15 chu luah theih lohin a chim vek a, tuiin a chim mai hlauh-thawnawma awm chhungkaw 52 an inthiar chhuak a, Bialtu MLA Pu K.Sang-ṭhuama chuan tui lenna hmun hi tlawhin, chhiat tawkte tan buhfai bag 15, silpouline bandel 3 leh a ṭul tula an hman atan Rs.10,000/- a pek bakah MLA relief fund aṭangin cheng nuai 5 a pek tur thu a sawi bawk.

Lunglei
Lunglei khawthlang lam Phairuang-kai khuaah pawh leimin vangin in pahnih a chim a, in pakhat zawk hi mitthi awmna in niin, nizan hmasa khan in neitu Pi Nila Moni tunu ruang an menpui laiin a chhak kopang minin in hi a hnawl a, khawtlangin ṭanpui hna thawk nghalin ruang tu tih la hriat loh pakhat chhar a ni tawh a, an lumen lai naupang ruang leh Pu Dari leh Pu Botro te chu hmuh an la ni lo thung. In chim pakhat zawk hi Pu C Taia (L) in a ni a, nimin zing dar 5 vel khan a awmna lei a tawlh a, bungrua tlem azawng an thiarchhuak hman tih loh chu in hi a chim vek a, Thi leh hliam erawh an awm lo.

Changpui, Lunglei district-ah pawh nizan hmasa dar 10 vel khan Pu Romawia huan min chuan a thlanglam a awm, Pu Lalchhuanmawia In chu hnawlin, a thlang luikawrah a hnawl thla a, Chhungkaw Nu ber Pi Lalhunmawii leh an fapa naupang ber chu hmuh an la ni lo.

Zawlpuiah pawh In 10 chu tui lianin a chim a, chhungkaw engemawzat chu tuilian hlauh vangin an in thiar chhuak bawk. Khaw mipuite feh kawng ber, Kai lui a suspension bridge leh an tui lakna tui pipe line 2 tui lianin a tihchhiat avangin harsatna an tawh chhoh theih thu kan thu dawnna chuan a sawi. Zobawk khuaah pawh In pathum leimin avanga luah ngam lohin a awm a, Dawn khuaah In Pakhat thliin a len thlu bawk. Heng hmunah te hian District Desaster response team te kal nghalin a tul angin tanpuina leh chhawmdawlna hna an thawk a ni.

Tlabung ah chuan tui lianin chenna in 74 a chim tawh a, chhungkaw 83 ten an chenna in an chhuahsan tawh a. Tlabung Sub Division huam chhungah tulian avanga chhiatna thleng ah mi 10 in nunna an chân tawh a, mi 3 ruang hmuh a nih tawh laiin mi 7 ruang erawh hmuh ala nilo thung a, chenna in 350 vel tui lian hian a chim tawh a ni.

Lawngtlai
Lawngtlaiah chuan nimin zing lam dar 5 vel khan Lawngtlai-IV Kanan Veng a Pu Nitawha In sir chu minin, heihian a thlang kawngpui, Lawngtlai atanga khawthlanglam panna chu a hnawhping a, mi tlawmngai ten a thenfai hna thawk nghalin sawrkar hotuten a hmuh ah kalin an tlawh bawk a. Lawngtlai Bazar atanga Electric Veng panna kawng pawh nimin khan leiminin a hnawhping bawk. Hei bakah hian Lawngtlai-III thlanmual chu min mai hlauhthawnawmin a awm mek a, thlan pali vel sawn ngai a awm vangin nimin tlai lam khan khawtlang chuan thlan sawn hna hi an thawk nghal a ni.

Mamit
Mamit District a Phaizau khau chu Tut lui a len avangin an khaw pum a chim a hlauhthawnawm nia thu dawn a ni a, an eizawnna ber an lo leh an lawngleng te chu tui lian hian a la vek tawh bawk niin Phaizau YMA President Hreuthangpuia Chhangte chuan a sawi.

Leave a Reply

This site uses Akismet to reduce spam. Learn how your comment data is processed.