Serchhipah bawngpui 87 chiah a awm

Serchhipah Statistics Day hman a ni

Nimin chawhnu dar 1 khan District Research Office Coference Hall, Serchhipah Statistics Day vawi 11 hman a ni.
He hun Pu VL Remliana, MPE&SS, District Research Officer kaihhruai inkhawmah hian khuallian Pu VL Remliana, MCS, Project Director, DRDA Serchhip chuan thusawiin ram changkanna hi thahrui leh mipui tam lamah a innghat lovin hriatna (knowledge)-ah a innghat zawk a ni, a ti a, kan ram hmasawnna atan hmathlir (vision) kan nei ṭha tawk lova a hriat thu a sawi a, vision nei tur pawhin hriatna a ngai a ni a ti a, he huna zirlai kalkhawm te chu vision ṭha tak ngaihtuah chhuah tum chunga an zirlai te zir turin a fuih a, enge kan ramin a mamawh tih ngaihtuah chhuah tum turin a fuih a ni.

He hunah hian Pu Laldinpuia, Asst, Professor, Economic Department, Govt. Serchhip College chuan kumina Statistics Day Theme ‘Administrative Statistics’ tih thupui hmanga thusawiin, Administrative Statistics chu sawrkar inrelbawlna leh inenkawlna atana statistical data lakkhawm a nih thu leh hei hi Indian Statistical System-a ban pawimawh ber a ni tih a sawi a, sawrkarin policy siam dawn se a tih hmasak tur chu data lakkhawm a ni tih sawiin, Statistics chu sawrkar inrel-bawlna leh ruahmanna hrang hrang siamna atan a ṭangkai a ni a ti a, statistical data lak-khawm ṭhat leh ṭhat loh te, a dik leh dik loh te hian a ṭha zawng leh a chhe zawngin sawr-kar inrelbawlnaah nghawng lian tak a nei a, statistics dik lo hi a pawi thei hle a, sawrkar mualphona a ni a, fimkhur a ngai a, statistics dik hmang chuan plan leh project dik taka siam theihna a ni tih a sawi bawk.

‘Importance of reliable statistics in the context of veterinary statistics’  tih thupui hmangin Dr. R. Lalmakthanga, Chief Veterinary Officer, Serchhip pawhin thusawiin, Statistical data lakkhawm hmangin Mizoramin artui, sa, bawnghnute leh thil dang a thar chhuah zat chhût chhuah ṭhin a ni tih a sawi a.

AH&Vety Department–in Statistical data an lakkhawm hmangin tunah hian Serchhip-ah bawng vulhtu an tlem hle tawh tih hriat a nih thu a sawi a, tun dinhmunah Serchhip-ah bawnghnute sâwr tur bawng vulhtu chhungkaw 30 pawh an tling tawh lo a, Serchhip-ah bawngpui 87 chiah a awm thu leh heng zinga hnute sâwr tlak chu 50 pawh a tling mang tawh lo tih a sawi a, Serchhip-a bawnghnute thar chhuah zat hi ni khatah 210–250 litres vel a ni a, hei hi Serchhip mipuiten insem ta ila, ni khatah 10ml vel ṭheuhin kan insem thei dawn a, Indian Council of Medical Research recommendation ang chuan mi pakhatin ni khatah bawnghnute 240ml in tur a ni a, hei hi kan phâk lo hle a ni a ti.

Mizo te ran ngaihhlut sial pawh Mizoramah 1939 chauh a awm tawh thu leh Serchhip District-ah 171 chiah a awm tih sawiin, Sial tihpun kawngah ṭan lak a ṭul a ni a ti bawk.

Statistics Day hi Nation Sample Survey (NSS) leh Central Statistical Organisation (CSO) dintu leh D2  Statistics an tih tak, ‘Mahalanobis Distance’ rawn chhawp chhuaktu Prof. Prasanta Chandra Maha-lanobis piancham hriatrengna atan kum 2007 aṭanga hman ṭan a ni a, nimina he ni puala hun hmannaah hian Pu K. Lalruat-puia chuan Prof. Prasanta Chandra Mahalnobis chanchin a chhiar chhuak bawk.

He hunah hian tualchhung thuthar thehdarhtu te leh sawrkar official te bakah Marian High School leh Govt. Serchhip Higher Secondary School zirlai naupangte an tel a ni.

Leave a Reply

This site uses Akismet to reduce spam. Learn how your comment data is processed.