Tui nû vanga harsatna thleng ṭhin sutkian tumin hma la mek

Fur laia Tuikum lui tui a nut nasat ṭhin avanga Serchhip khawpuiin tuia harsatna a tawh fo ṭhin sutkian a nih theih nan Tuikum Water Treatment Plant bula kawrte tui chu lâk tumin hma lâk mek a ni.

Kum dangah pawh Serchhip khawpuiin harsatna a lo tawh fo tawh ṭhin, Tuikum lui tui chu fûr laia nasa taka a nut ṭhin avangin PHE Department chuan fur laiin tui sem kawngah harsatna an lo tawk fo ṭhin a, hei hi a chhan chu Pump tlak loh khawpa nasaa tui a nut ṭhin vang a ni a, he harsatna hi sutkian tumin Serchhip bialtu SDO, Er. K.Lalrintluanga leh a thawhpui te chuan Tuikum Pump House bula kawrte tui chu lâk tumin hma an la mek a ni.

He lui te tui hi lâk tum a nih chhan hi tui pump kawnga harsatna sutkian tumna a nih bakah fur laia Tuikum tui tihfim nana Chemical hman tihtlem a nih theih nan leh tui quality ṭha mipuiten an ei theih nana ruahman a ni a, he ruahmanna hi tihhlawhtlin a nih hunah chuan Tuikum Raw Water pump-na Energy Bill tihtlem a nih mai bakah Chemical hman chu 50% laiin tihtlem a ni thei dawn tih Serchhip Division Sr. EE, Er. F.Lalsanglura chuan Zothlifim a hrilh a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram