Champhai-ah tunhnai aṭanga chhan hriat loha Vawk thi leh damlo tam tak an awm chungchangah nimin khan Champhai District Vawk Vulh Association meeting an nei a, an Resolution siamah chuan Champhai Deputy Commissioner-in Myanmar leh State dang atanga Vawk leh ar lakluh a khap chu lawmawm an tih thu sawiin, an thlawp tlat tih an sawi a, sawrkar order pawisa lova Vawk leh Ar lalut lui chu theihtawpin an do zel dawn tih an passed.
Champhai Vawk Vulh Association hian an hriat theih chinah vawk 79 thi report an dawng tawh a, Champhai Bethel venga mi Pu K. Lalengthanga’n vawk 12 a chân a, hriat theih chinah ani hi chân hnem ber a ni.
AH&Vety Secretary Pu B. Lalthanliana chuan vawk damlo thisen leh taksa peng te hi lain, tunah hian College of veterinary Science and Animal Husbandry a Laboratory ah enfiah mek a ni a ti a, karleh chho hian a result hriat theih an inbeisei a, vawk natna hi PRRS nge a niha vawk pul hri pangai (classical swine fever) tih chu endik hnu-ah chauh sawi theih a nih tur thu a sawi.