Video technology-a harsatna awm siamthat tum

FIFA chuan Video Technology chu 2018 World Cup-ah an hmang dawn a nih chuan Confederation Cup-a Video Technology-a har-satna thleng chu siamṭhat a ni ang tih an sawi.
FIFA hian nakum Russia World Cup-a Video Assistant Referee (VAR) hman a nih dawn leh dawn loh hi nakum March thlaah thutlukna an siam dawn a, FIFA Head Referee Massimo Busacca chuan kumina Confederation Cup group game 12 an khelhah he system hian vawi 6 lai game thutlukna siam dik kawngah a pui tih a sawi a, “Result ṭha tak kan nei a, mahse engemawzat-ah thuamṭhat ngaihna lai chu a awm a ni,” tiin a sawi.

Busacca chuan Video replay team-in an ennawn leh hnu-ah thil lian tham thleng 29-ah Officialte chuan thutlukna dik tak an siam tih hriat a nih thu a sawi a, FIFA chuan an member ram te chu VAR hmantir dan a zawng tih a sawi bawk.

Hetihlai hian inkhel entu, Player leh team official te chuan VAR hman a nih avanga official-ten thutlukna siam diklo an nei chu an sawisel a, Busacca chuan referee te chuan he thil hi engtianga hman tur nge? eng huna hman tur nge tih an zir a la ngai deuh a ni a ti bawk.

Confederation Cup khelh mekah Pathiannia Germany-in 3-1-a Cameroon an hnehnaah khan Germany player Emre Can laka Ernest Mabouka a foul-naah Colombian referee Wilmar Roldan chuan Cameroon captain Sebastian Siani zawk Yellow Card a pe a, VAR a râwn hnuah Roldan chuan  Siani hi Red Card a rawn pe leh a, mahse a tisual tih an hrilh hnuah VAR hi râwn lehin Mabouka zawk chu a hnawtchhuak ta chauh a ni.